Monday 25 June, 2018

15 Prosès-verbal X-Team: E kòntròlnan di X-Team lo kontinuá

X-Team a repartí entre 18 di aprel i 11 di mei 2018 un total di 15 prosès-verbal. Esaki durante diferente kontrol i akshon. Ministerio Públiko (OM) Kòrsou awor ta den proseso pa evaluá i prepará esaki nan pa bai Korte.

A repartí e prosès-verbal pa entre otro transportamentu di santu sin tapa esaki (3 pv), dùmpmentu di sushi (afval) riba kaya (6 pv), zonido demasiado duru (1 pv), ponementu sushi riba kaya públiko (1 pv) i dùmpmentu di sushi gròf, sushi di konstrukshon i di kura di kas riba un tereno riba Rooseveltweg na altura di Hato (2 pv).

X-Team a konstatá e hechosnan kastigabel aki riba vários sitio i lokalidat, entre otro riba Kaminda Jose Liberia, Mirla Platéweg, Juan Domingo, Kaminda pa Santa Catharina, Weg naar Fuik, Groot Santa Martha riba playa di Marie Pampoen, Kaya Celdu, Nijmegenstraat i Veeris na altura di Sambil pa zonido duru (geluidsoverlast).

X-Team ta konsistí di diferente instansia, entre otro Servisio di Maneho di Medio Ambiente i Naturalesa (MNB) i Inspekshon di Salubridat Públiko (IVG) di Ministerio di Salubridat, Medio Ambiente i Naturalesa (GMN), Stichting Belastingaccountantsbureau (SBAB), Domeinbeheer, Servisio di Obranan Públiko (OW) i Servisio di Desaroyo i Planifikashon Urbano (ROP) di Ministerio di Tráfiko, Transporte i Planifikashon Urbano (VVRP), Selikor; HIT-team di Kuerpo Polisial di Kòrsou (KPC).

Por mèldu na 0800-0877 (orario di ofisina) òf via mail: xteamcuracao@gmail.com