Thursday 18 January, 2018

2 persona ta fayesé despues ku outo a dal nan riba Seru Fortunaweg

Segun e promé informashon tabata den kareda di 9’or pasá di anochi ku outoridatnan mester a sera area banda di e T kruising di Seru Fortunaweg / Caboverdeweg despues di un aksidente kaminda 2 persona a bin pèrdè nan bida.

Segun e promé informe, e 2 personanan aki a sali for di un vehíkulo i tabata krusando pa bai snek " papa ku pechi". Aki nan un Honda a bini ku velosidat haltu i dal e 2 hòmbernan di kual un a keda pushá i bentá riba kaminda i e otro a keda pegá den winshil kaminda mitar di su kurpa tabata aden i otro pafó. Ambulans ku a bini e sitio no por a hasi nada mas pe víktimanan. Nos redakshon a komprondé na momentu ku e aksidente a sosodé, e shofùr dje Honda a bai for dje sitio, esaki probablemente di spantu.

RAPORT DI POLIS// 

Djadumingu 7 yanüari 2017, alrededor di 20.55 or sentral di polis a haña notifikashon ku riba Seru Fortunaweg na altura di un establesimentu, un outo a alkansá dos(2) peaton i ku nan situashon ta hopi grave. Na yegada di e patruya polisial nan a bin topa ku e un hòmber drumí abou i un otro homber ku tabata pegá den winshil di un outo. Niun di e dos víktimanan aki no tabata duna señal di bida.

For di un investigashon preliminar ku polis a realisá na e sitio a resultá ku e hòmbernan aki probablemente a baha for di un di nan su vehíkulo pa bai krusa kaya (Seru Fortunaweg) pa bai na un establesimentu ku tin riba e kaya menshoná. Pa un motibu ku te na e momento aki ta den investigashon, un outo kondusí pa un dama ku tabata koriendo riba e kaminda aki a alkansá ámbos peaton ku e konsekuensia ariba menshoná. E víktimanan a risibí multiple leshon na nan kurpa i alrededor di 22.15 or i 22.20 or dòkter di polis a konstatá morto di respektivamente:

1. Erwin Severino DJAOEN, nasé na Kòrsou 8 yanüari 1947
2. Harold Benito DJAOEN, nasé na Kòrsou 3 aprel 1948

A konfiská e vehíkulo involví pa mas investigashon. E investigashon den e kaso aki ta kontinuá.