Thursday 19 October, 2017

Ainda 'Bon Futuro' no ta kumpli kompletamente ku norma internashonal

Sentro di Detenshon i Korekshon Kòrsou (SDKK) ta ehekutando algun proseso pa optimalisá e trato di detenido. Tambe ta siguiendo diferente trayekto pa pone e posishon hurídiko di e detenidonan na nivel di normanan internashonal. Sinembargo, ainda SDKK no ta kumpli kompletamente ku tur norma internashonal.

Na e konklushon akí e Raad voor de Rechtshandhaving (Raad) ta yega despues di inspekshon. E Raad a tene kuenta tambe ku e rekomendashonnan di e ‘Committee for the Prevention of Torture’ (CPT) oropeo, pa wak te kon leu SDKK ta kumpli ku ley- i reglanan (internashonal). E Raad ta hasi diesnuebe rekomendashon pa mehorá e kuido pa detenido i tambe e provishonnan personal i organisatorio.

Mas médiko
E minister di Hustisia mester sòru pa mas médiko den SDKK, e Raad ta indiká. Lo mester tin por lo menos dos, pero ta un dòkter so ta konektá ku e institushon. Posibelmente e ánimo bou di médikonan lokal ta abou pa traha pa SDKK. “Rekrutá nan eventualmente for di eksterior (regio) anto”, e Raad ta proponé.

Tambe e Raad ke mira e kuido médiko bira mihó pa por duna por lo menos kuido preventivo i un chekeo médiko denter di 24 ora despues di yegada di un detenido. Mas aleu den e ámbito di salú, e Raad ke mira progreso a korto plaso riba tereno di higiena. Mester stipulá i ehekutá palabrashonnan apropiá pa esaki. I: “Manehá un proseso kontínuo pa evaluá e kalidat i e variedat di kuminda.”

Ventilashon i informashon
A mediano plaso SDKK ta hasi bon di mehorá e ventilashon di e sèlnan i di kontinuá ku e adaptashonnan di konstrukshon ku ta tumando lugá. Mester formulá un programa di aktividat tambe, meskos ku mester apuntá funshonario di konfiansa.

E Raad ta desaprobá ku no ta tur blòk tin buzon pa pòst, pasobra asina no ta salbaguardiá entre otro e derecho riba privasidat. Mester hasi lihé ku mehoramentu di e posibilidatnan pa por sigui medionan di komunikashon. Mas pronto posibel mester entregá foyetonan tambe tokante e derecho- i e debernan di e detenido. Tambe mester realisá lihé ku Ministerio Públiko ta hasi entrega fásil i sin tardansa di tur sentensia: no ta tur dossier ta kontené un sentensia.

Sankshon i keho
Ora di evaluá si un detenido ta bini na remarke pa Supervishon Elektróniko of pa Libertat Kondishonal, e Raad ke mira ku ta tene kuenta ku e persona konserní su komportashon durante henter e periodo di detenshon. Mester adaptá i mehorá e areglo pa sankshonnan i e registrashon di esakinan.

Ta ora pa finalisá e proseso di keho i mester evaluá e posibilidat pa un dunadó di keho por risibí un komprobante.

Integridat i kapasidat
SDKK mester sòru pa a korto plaso e reglanan di integridat ta konosí bou di e personal. Tin un kódigo di kondukta den e kadena hudisial i SDKK tin instrukshon pa su personal. E personal di seguridat i algun hefe di departamentu a sigui un kurso riba integridat na e Opleidingsinstituut Rechtshandhaving en Veiligheid.

Pero mester di mas personal. Esaki lo yuda tambe ku siguimento di otro rekomendashonnan: aworakí, por ehèmpel, no por ehekutá programanan di aktividat di un manera struktural pasobra e personal, ku ta insufisiente kaba na kantidat, mester atendé ku e seguridat di gèngnan ku ta pleitá tambe. E rapòrt di inspekshon kompleto ta disponibel di forma digital riba www.raadrechtshandhaving.com