Friday 18 August, 2017

Apoyo pa hóben ku hopi potensial riba Dia Internashonal di Hubentut

Nashonnan Uní a dekretá 12 di ougùstùs komo Dia Internashonal di Hubentut. United Nations Development Programme (UNDP) Kòrsou a rekonosé talento i determinashon di un hóben ku tin un futuro prometedor su dilanti, komo parti di e selebrashon internashonal aki. Celine La Cruz, un hóben eksitoso, ta bai terminá su preparashon sekundario na Armenia. E aña aki e tema pa Dia Internashonal di Hubentut ta “Youth building peace”, rekonosiendo di e forma aki hubentut su kapasidat pa por kontribuí ku prevenshon di konflikto, transformashon, inklushon, hustisia sosial i pas sostenibel. Representashon di UNDP na Kòrsou a sera konosí ku Celine durante un kòntèst di spich na òktober aña pasá, organisá pa Kuerpo Konsular di Kòrsou den kuadro di selebrashon di Dia di Nashonnan Uní. Celine tabata e ganadó apsoluto di e kòntèst aki. E ta un studiante ehemplar di 16 aña, nasé i kriá na Kòrsou i e ta bishitá Kolegio Alejandro Paula (ántes Peter Stuyvesant College).

Kaba su VWO sin mas ta un meta importante p’e, pero awor el a haña e oportunidat pa kab’é pafó di Kòrsou, na Armenia. Na Kòrsou tin e posibilidat tur aña pa hóbennan den e klasnan di pre-èksamen di HAVO i VWO kaba nan estudio sekundario afó, na un United World College (UWC). E skolnan aki tin komo meta pa hasi di enseñansa un instrumento pa uni hende, nashon i kultura pa logra pas i un futuro sostenibel. Ta netamente pa e motibu aki ku UNDP ta pone Celine den lus positivo, mirando ku studiando afó, na un pais ku kua Kòrsou no tin vínkulo kultural, e ta bai haña e Pagina: 2 oportunidat pa kultivá balornan indispensabel, pa por aportá aktivamente na e tema ku Nashonnan Uní a skohe e aña aki. E proseso di selekshon pa atmishon na un UWC ta unu riguroso ku no solamente ta wak prestashon akadémiko di un studiante pero tambe su personalidat i aktividatnan èkstra kurikular.

Na Kòrsou tin un komishon ku ta evaluá e studiantenan ku apliká, pero e beka mes ta bini di Ulanda. Den Celine su kaso, el a skohe un UWC na Singapore, pero debí ku e skol aki tabata yen, el a haña oportunidat pa e studia na UWC of Dilijan, Armenia. Nos Rei Willem Alexander tambe a risibí parti di su formashon na un UWC. Den su kaso, el a studia na UWC Wales, Gran Bretaña. Celine ta preparando pa su biahe pa Armenia. Parti di su preparashon ta enserá preparashon mental pa studia den un ambiente multikultural.

Un otro aspekto importante ta e echo ku ounke lès ta na ingles, e idioma lokal lo ta kompletamente nobo pa Celine. P’esei mes e ta konsiderando pa siña papia Ruso, di manera ku tòg e por komuniká pafó di skol na Armenia. Loke Celine ta spera di regresá kuné Kòrsou aki dos aña ta madures i e eksperensia di por a kombibí ku studiantenan di otro kultura.