Thursday 19 October, 2017

Atrakador i viktima ta muri durante atrako na Rooi Santu

Djaweps 5 òktober 2017, alrededor di 01.02 or sentral di polis a risibí un yamada ku tin un ladronisia ku violensia a tuma lugá na un Minimarket na Rooi Santu i ku tin hende heridá.

Mesora e patruya a bai na e sitio i a konstatá ku tabatin un siudadano Chines(hòmber) drumí abou parti paden di un garashi ku ta pegá na e Minimarket i un otro hòmber ku kapuchon i handskun bistí ku tabata drumí abou na suela den banda di e minimarket. Niun di e dos hòmbernan aki no tabata duna señal di bida.

Un investigashon preliminar ku polis a realisá na e sitio a resultá ku un pareha a yega kas i parker nan vehíkulo den e garashi den banda di e minimarket. Nan a baha for di outo i dado momento a bai sera e porta di e garashi. Na e momento ei tres(3) persona kara tapá a pusha e porta di garashi drenta paden i a atraká e pareha. A surgi un forsageo. Diferente tiru a kai ku e konsekuensia ariba menshoná. Te na e momento aki no tin un klaridat kiko presis a sosodé. Ámbos hòmber tabatin herida di bala na e parti ariba di nan kurpa.

Dr. di polis a konstatá morto di ámbos persona. Riba òrdu di Fiskal di Ministerio Públiko a konfiská e kurpa sin bida di e personanan aki. Na e sitio polis a haña i konfiská un arma di kandela, algun huls, i otro artíkulonan ku ta di importansia pa e investigashon. Manera ya ta konosí, na momentu ku informá famia(nan) i nan rekonosé i establesé identidat di e personanan aki, ta publiká nan identidat. Ta supliká tur persona ku tin kualke informashon di e kaso aki, pa pasa esaki pa polis via di number di telefòn 866-6141, 917 òf 108(riba e number aki bo anonimidat ta garantisá).