Saturday 26 May, 2018

Bewaker insidente di tiramentu na Porto Mari djaweps pa ‘bewaring’

Ministerio Publiko (OM) ta deklará, relashoná ku un investigashon despues di un insidente di tiramentu na Porto Mari den marduga di djadumingi 6 di mei pa djaluna 7 di mei, lo sigiente:

Tin e sospecho aktualmente ku 1 di e 2 bewakernan na e sitio a los varios tiru riba 2 presuntu ladron na e ‘duikshop’ di Porto Mari. Aki 2 presuntu ladron a keda herida gravemente i transportá pa hospital. Ounke ku na prome instante nan a keda detene i vigilá 2 dia den hospital pa polis, a disidi pa laga nan den liberta despues di 2 dia. Esaki mirando nan heridonan i e peso di e presuntu hechos. Ambos ta keda sospechoso di ladronisia i lo keda persigui pa esaki.

E bewaker E.R.S. ta ser akusá awor di dos biaha intento di homisidio i poseshon di un arma di kandela ilegal. E ta será ainda. Esaki pendiente mas investigashon polisial. Na opinion di Ministerio Publiko te na e momentunan aki no tin insufisiente punto di referensia di defensa propio, loke por a hustifika pa tira.

Mas investigashon mester determiná bou di kua sirkumstansia el a tira. Mirando e importansia di mas investigashon ta nesesario pa e bewaker keda mas largu será. Pa e motibu aki ta presenta e bewaker djaweps na Wes-komisario (RC) pa su periodo di ‘bewaring’.