Monday 18 December, 2017

CHATA: Mester fortifiká e posishon di operadornan di buseo na Kòrsou

Na komienso di e aña aki CHATA i CTB a organisá un Dive World Café ku e meta pa amplia konosementu riba e tópiko di buseo i su impakto den nos industria turístiko i ekonomia di Kòrsou. E seshon a resultá un hèrmènt ideal; e punto di akshon primario tabata pa prepará un estudio riba impakto di e industria di buseo na Kòrsou.  Despues di e seshon CHATA Dive Task Force huntu ku Jerry Beaty i Linda Wulf  di Dive Training Magazine a desaroyá un enkuesta den kual a aserká mas di 40 operador di buseo na Kòrsou.  Diesnuebe a respondé i partisipá na e enkuesta importante aki.  Kada un di e operadornan ku a partisipá tin kontakto direkto ku e turista i a duna CHATA su ekipo di trabou un bista amplio di e manera kon e industria aki ta funshoná.

Lèsnan mensual di buseo:

Mensualmente mas ku 1,813 persona ta tuma lès di buseo na Kòrsou. Ademas di ofresé buseo rekreashonal na e turista, ta duna lès na e bishitante lokal tambe. Mas di 1,200 persona ta sigui lès di introdukshon, riba 300 persona ta tuma lès ‘open waters’, 124 persona ta tuma lès avansá i entre 100 ku 150 persona ta tuma kursonan di buseo speshalisá. No por lubidá e lèsnan di reskate ku tambe ta wòrdu duná na diferente sentro di buseo.  Den e industria aki ta inkluí ‘snorkling’. For di estudionan hasí resientemente por a konkluí ku mensualmente mas di 1,591 persona ta snòrkel komo parti di nan vakashon na Kòrsou.  Por menshoná tambe ku ta duna un average di 3,751 buseo ku guia, den kual e turista ta skohe pa ‘dive’ komo parti di nan tour of pakete di estadia- esaki mensualmente i repartí den ‘tank boat dives’ i tambe ‘tank shore dive’ di 1 òf 2 tanki. Kada sambuyadó ta hasi uso di 1 tanki i mei, kada bes. Tur operador huntu ta hür aproksimadamente 4,596 tanki pa luna!  Interesante hasi menshon ku mensualmente tambe tin 3,064 seshon di buseo sin guia, esaki ta na unda ku e turista riba su mes inisiativa ta sambuyá i ta yena e tanki na e operador. Esaki ta hiba nos na 6,815 seshon mensualmente, ekskluyendo snorkling. For di sifranan kompilá pa CHATA Dive Task Force ta konkluí ku tin aproksimadamente 227 seshon di buseo ta tuma lugar diariamente na Kòrsou. E sifra aki ta oumentá na 340, ora inkluí esnan ku ta snòrkel tambe.

Kuponan di trabou:

Pa duna servisio òf lès mester pone man na obra, esaki ta nifiká ku ta krea kupo di trabou tambe! Estudio hasí entre e partisipantenan ta mustra ku e industria di buseo na Kòrsou ta pèrkurá pa un average di 322 empleado, entre nan e grupo di full time te’sun di mas grandi siguí pa e instruktornan (104), i despues empleadonan part-time, kapitan i otro ayudantenan.

Entrada Mensual, Retail:

Estudionan hasí dor di CHATA Dive Task Force ta indiká ku e industria di buseo ta pèrkurá pa un entrada di aproksimadamente $195,000 mensual na retail. Akinan ta inkluí artíkulonan di buseo, di laman i tur loke ku e sambuyadó tin mester pa praktiká e deporte i ku ta wòrdu kumprá serka e operador di buseo. Te hasta souvenir. Un 45.5% di e turistanan ku ta bin Kòrsou  i ta inkluí buseo den nan ‘things to do’ ta keda na hotèlnan grandi, 22 % na hotèlnan chikí, 14.8% na apartamentunan ku ta wòrdu di hür ku turista, 13.8% tin hospedahe privá i 3.9% ta indefiní.  Nan ta varia di pais di residensia, 34% ta bin di Nort Amérika, 42% for di Hulanda, 12% for di Alemania i 12% for di Sur Amérika.

Sifranan anual:

CHATA ta konvensí ku e industria di buseo tin un potensial enorme. E invershon di kada sambuyadó pa dia na e deporte ta aproksimadamente $100- pa aña esaki ta nifiká un entrada di $12,410,000 (NAFL 22,089,800). E sambuyadó ta gasta, na un average di $150 pa dia, un total di $14,499,625 na hospedahe- pa aña. Sifranan akumulá den e enkuesta, ta indiká ku e sambuyadó ta gasta aproksimadamente $100 na kuminda i bebida tambe, anualmente esaki ta $12,410,000.  Ora konta e.o lèsnan di buseo, estadia, kuminda i bebida, hür di outo, benta di ekipo ets. i airport tax, ta konkluí ku e industria di buseo ta kontribuí ku aproksimadamente $41,319,914 pa aña na nos ekonomia lokal.

Di akuerdo ku Miles Mercera, Presidente i CEO di CHATA, “E aporte di buseo i ‘snorkling’ na nos ekonomia ta kuantioso. Mester eksplorá tur oportunidat ku e industria ta trese kuné. Nos ta proponé pa promové Kòrsou komo un destinashon pa e turista sambuyadó tambe. Ainda tin hopi hende ku no ta konsiente di Kòrsou su beyesa bou di laman. CHATA ke suprayá e esfuersonan di e operadornan. Ta importante pa protehá sitionan di buseo i pa di un forma strukturá garantisá kresementu di e industria. Meskos ku e operadornan ta partisipá na programanan di sertifikashon ku e meta pa halsa nivel di loke nos ta ofresé na e turista, CHATA ta urgi gobièrnu pa bin ku inisiativanan i pa di un òf otro manera establesé leinan ku ta fortifiká e posishon di e operadornan di buseo. Manera ku e estudionan resién ta indiká, nan kontribushon na ekonomia di Kòrsou ta sumamente balioso”.