Monday 18 December, 2017

CHATA: Un wèlga por interumpí e sektor di Turismo

Curaçao Hospitality and Tourism Association ta hopi prekupá ku e impakto ku e wèlga ku a keda anunsiá lo tin riba nos sektor di turismo i ekonomia en general.  CHATA ta risibiendo hopi preguntá diparti di turista i miembronan tokante e situashon aktual i ta urgi e partidonan enbolbí pa buska diálogo pa asina por yega na un akuerdo.

CHATA ta komunikando ku su hotèlnan I partnernan for di ayera antisipando e situashon  ku ta premirá mañan. CHATA a aserká tur hotèl i tour operator pa tuma medidanan di prekoushon pa sigurá ku nos por keda brinda servisio optimal na nos bishitantenan.

Echo ta ku e menasa aktual di un wèlga tin un impakto grandi riba nos sektor di turismo. Nos bishitantenan mester por trafiká riba nos isla libremente, mester por yega aeropuerto I tambe otro puntonan di interes riba nos isla.  Si esaki no sosodé e por tin un impakto negativo riba e eksperensia di nos turista I e por tin un impakto riba negoshinan manera restorant, operadónan di sambuyá i guianan turístiko ku no por brinda nan servisio of bende nan produktonan.

Aktualmente e hotèlnan na Kòrsou ta 80% yen, kual ta nifiká ku ta di sumo importansia pa e situashon aktual keda resolvé mas pronto ku ta posibel pa asina nos por garantisá e nivel di servisio ku nos miembronan tin ta brinda na e míles di turista riba nos isla. CHATA lo keda monitòr e situashon I informá su miembronan debidamente.