Thursday 18 January, 2018

Demanda 22 aña prisòn pa asesinato Adriana Morales de Florencio

Fiskal di Ministerio Públiko (OM) BES a hasí djaweps den sala di Korte di Boneiru un demanda di 22 aña di prisòn pa e hòmber R.E.G.S. a tratá di morto di Adriana Morales de Florencio di 23 aña di edat na luna di aprel 2017, e kaso a bira konosí komo “TGO Saturnus”.

E víktima Adriana tabata traha komo tripulante riba e barku krusero “Navigator of the Seas” di e kompania krusero Royal Caribbean Cruiselines (RCL). Dia 20 di aprel 2017 el a baha for di e barku pa kumpra souvenir den sentro di siudat di Kralendijk, pero nunka no a regresá e barku di turista.

Rápidamente, debí na testigu i imágen di kámara di seguridat, R.E.G.S. ta keda identifiká komo sospechoso den desaparishon di Adriana Morales de Florencio. E mesun anochi ta tene un entrada hudisial na su kas i boka di trabou. Den su ofisina ta topa ku un arma di kandela ku munishon. E ta ser detené pa violashon di Lei di Arma. Dia 29 di aprel 2017 ta sigui un entrada hudisial na un kunuku den bisindario di Rincon na unda ta enkontrá e kurpa sin bida di Adriana.

E hayasgo di e kurpa sin bida a pèrkurá pa hopi disgustu i indignashon den komunidat pa Boneiru, di akuerdo ku Fiskal den su rekisitorio djaweps. “Komunidat a reakshoná konmoví”, di akuerdo ku Fiskal durante tratamentu den Korte.

R.E.G.S. ta ser sospechá ku e ta esun ku a usa un kuchú pa mata e víktima. Seguidamente el a dera Adriana pa skonde su akto. For di e investigashon a Sali na kla ku e kier a tene relashon seksual ku e dama. Na momentu ku Adriana a ninga, el a usa vários biaha un kuchú pa mata su víktima.

For di reportahe sikiátriko i sikológiko suministrá pa Reclassering a sali na kla ku e sospechoso ta kompletamente responsabel pa su aktonan (volledig toerekeningsvatbaar). E no ta den poseshon di un karchi di kastigu. E sirkunstansianan aki no tabata motibu pa Fiskal pa tene kuenta ku un redakshon di su demanda.

Si, Fiskal a deklará, ku tin motibu pa oumento di un demanda. Fiskal a referí na e manera kruel ku e sospechoso a likidá e víktima. El a lòk Adriana den su outo miéntras ku riba su laptop a haña pruebá ku promé ku e asesinato el a bai wak pòrtret i videonan hopi violento riba kual por mira kon ta mata i violá hende muhé yòn. Despues di e likidashon di Adriana el a laga Adriana manera sushi atras den un kruiwagen i a bandoná e sitio. El a warda te anochi pa dera Adriana, pa di e forma ei skonde tur prueba di e asesinato.

Morto di Adriana a kousa un akto doloroso i irevokabel pa famia di e defuntu. Spesífikamente pa e manera inhumano ku el a mata Adriana i e manera baho ku el a atendé ku e defuntu.

E echonan aki tabata tin un impakto grandi riba famianan ku a keda desampará atras. Tambe e desaparishon i morto di Adriana a kousa sentido di intrankilidat i insiguridat den komunidat di Boneiru. E komunidat tabata hopi konmoví pa loke a sosodé riba Boneiru. Pa e motibunan aki e Fiskal a hasí un demanda awe pa 22 aña di prisòn pa e hòmber R.E.G.S.

Wes lo duna veredikto dia 31 yanuari 2018