Monday 25 June, 2018

Detenshon di atrakadonan di un toko den área di Muizenberg

Djabièrnè 18 di mei 2018, alrededor di 22.34 or di anochi, Sentral di Polis a risibí notifikashon di un kaso di ladronisia ku violensia ku a tuma luga na un Toko den área di Muizenberg. Sentral a meldu ku dos (2) hòmber bou di menasa di arma di kandela a kita pertenensia for di dos dama. Despues di nan akto e sopechosonan a bai for di e sitio den un Toyota Vitz koló shinishi. E personal di Tim di Manteshon di Orden Públiko bayendo na e sitio a siñala e outo Toyota Vitz koló shinishi na krusada Gosieweg/ Schottegatweg Noord. Mesora e patruya a bai tras di e outo i ordená e shofùr pa para e vehíkulo. E shofùr a para e outo kantu di kaminda pero na mes momentu tres porta di e outo a habri i tres (3) hòmber a baha for di e outo i kore bai na pia. Mesora polis a start un persikushon na pia tras di e tres hòmbernan aki kual dos di nan ta kuadra ku deskripshon di e sospechosnan ku Sentral di Polis a duna un ratu prome, ku a kometé e ladronisia ku violensia. Durante persikushon polis a los tiru di advertensia pero e sospechosonan a sigui kore. Despues polis a los un tiru dirigí ku a alkansá un di e sospechosonan na su pia drechi. Na e momentu ei polis a detené dos di e sospechosonan. Algu mas lat polis a detené e di tres (3) sospechoso den un kas den konstrukshon kaminda e la bai skonde.
Ta trata di e hòmbernan sospechoso:

  • E.J. La C. di 24 aña di edat;
  • R.J.L.C. di 24 aña di edat;
  • C.J.A.C. di 23 aña di edat.

Tur tres nasé na Venezuela. Ambulans a transportá e sospechoso ku e herida di bala pa poli di SEHOS kaminda despues di tratamentu a transporté pa departamentu di reshèrshi. Polis a konfiská e Toyota Vitz i den e outo polis a haña i konfiská dos tas di hende muhe probablemente prosedente di e ladronisia ku violensia. A presentá e sospechosonan dilanti di un Fiskal ousiliar ku a ordená nan enkarselashon pa mas investigashon.