Monday 25 June, 2018

Detenshon durante entrada hudisial ayera na Jandoret i Steenrijk

Djarason 7 di mart 2018 den oranan di mainta trempan e Divishon di Krimen Organisá konhuntamente ku Atrako Team, UST i Team di Aresto a organisá un akshon dirigí riba algun persona i lokalidat kaminda tabatin fuerte sospecho ku tin presensia di arma di
kandela i/òf munishon. En konekshon ku esaki a tene entrada hudisial na seis (6) diferente kas, kaminda a drenta i a hasi investigashon. Durante di e investigashon na un di e kasnan, den área di Jandoret polis a haña i konfiská un pistol kargá ku bala skérpi. Kontinuando ku e investigashon den e kaso aki polis a detené e hòmber sospechoso R.F.M., nasé na Kòrsou di 39 aña di edat. Na un otro kas den e área di Steenrijk polis a haña i konfiská un kantidad di 61 gram di kokaina, 353 gram di mariwana i 16 gram di hash. Na e kas aki, polis a detené e hòmber sospechoso E.U.M.O. nasé na Kòrsou di 46 aña di edat, A presentá ámbos sospechoso dilanti di un fiskal Ouksiliar ku a ordená nan enkarselamentu pendiente di mas investigashon. E akshonnan dirigí aki ta kontinuá.

Download nos App grátis i lesa notisia mas lihé >  Android: http://bit.ly/GetLoopABC | iOS: http://bit.ly/GetiLoopABC