Friday 18 August, 2017

Diputado Abraham lo ta den bario pa skucha e suidadano

Diputado Abraham den su afan pa ta mas serka di e suidadano ta kuminsá e proyekto di “Diputado den Bario”. Su meta prinsipal ta pa e ta den bario tur luna pa skucha e suidadano. Lo bishitá e barionan di Rincon, Tera Cora, Nikiboko, Antriol, Playa i Nort Saliña. Abraham ta boga pa krea un plataforma kaminda un suidadano por sintié liber pa duna su opinion i tambe haña kontesta riba su pregunta. Abraham lo ta den bario di Rincon djarason, 16 di ougùstùs na ofisina ousiliar di gobièrnu for di 4’or pa 6’or di atardi.

Tur persona ku tin un pregunta òf ku ke kontribuí i duna un aporte na un mihó Boneiru por traha un sita adelantá. Kada sita lo tin un durashon máksimo di binti minüt i lo trata e tópiko ku e suidadano a indiká. Si tin dokumento ku ta relevante pa diskutí durante e sita, ta pidi kada suidadano ku tin sita pa manda esakinan adelantá via di imeil òf por pasa trese kopia na ofisina di diputado Abraham.

Suidadanonan ku ta interesá pa trese nan ideanan i preokupashonnan serka Diputado Abraham por tuma kontakto ku su ofisina telefon 7175330 tst. 1235 òf manda un imeil pa esmeralda.winklaar@bonairegov.com. Kada suidadano lo risibí un kontesta òf reakshon riba su pregunta, idea òf preokupashon. Di e manera aki diputado Abraham ta duna e suidadano e oportunidat pa resoná su bos i duna su opinion.