Friday 17 November, 2017

Eugene Rhuggenaath (PAR) ta reflekshoná riba asesinatonan di djasabra último

Ku hopi tristesa mi a tuma nota di e insidente ku a tuma lugá na Alaska snèk nochi (djasabra) kaminda kuater miembro di nos komunidat a perde nan bida. Esaki a sosodé no muchu leu for di nos sede den Saliña, unda nos tabata huntu pa inougurá nos kampaña pa elekshon. Mi mas sentido pésame ta bai na famia i amigunan di e defuntunan. E insidente tristu aki ta un rekordatorio ku nos tin hopi trabou ainda pa hasi pa stòp e violesia den nos komunidat.

Mi ta rekordà awe e mensahe di Papa Francisco pa e temporada di kuaresma, kaminda Papa ta kòrda nos ku: e ser humano ta un berdadero regalo pa nos propio bida. E ta kòrda nos kon pa trata nos prohimo, nos bisiña. Laga nos kòrda ku tur hende ta un otro persona su tata, mama, yu, ruman, famia, bisiña i amistad … sernan kerí. Laga nos kòrda esei promé ku nos hasi otro daño, no solamente ku violensia físiko, pero tambe ku palabra of pensamentu. Laga nos kòrda ku nos tur ta desea i tin derechi di biba den un pais kaminda nos por resolvé nos diferensianan na un manera sano i desente i kaminda nos por kombibí ku otro na pas i den trankilidat. Aki mi ta kòrda palabranan di e sientifiko famoso, Einstein, uniko manera pa alkansá pas pa ku komprenshon. ‘Peace cannot be kept by force; it can only be achieved by understanding’.

Mi ta realisá ku nos tin hopi trabou pa hasi riba e tereno ekonomiko, pero tambe sosial, pa asina yuda hopi famia mehorá e situashon den kual nan ta biba. Pa tur hende por tin un bida desente, trabou pa buta pan riba mesa i oportunidat real pa bai dilanti. Nos tin hopi trabou pa hasi riba e tereno di seguridat. Den kas, den bario i riba kaya. Komo mandatario nos tambe tin responsaibilidat pa duna e ehèmpel. Si nos ta komportá for di òrdu, ku ki kara nos ta pidi hóbennan pa keda leu for di krímen, pa nan no skohe e kaminda fásil, pa nan studia na skol. Mi promesa na pueblo di Kòrsou ta, ku nos ta bai duna prioridat na e arianan aki pa pèrkurá ku tipo di insidentenan aki no ta ripití. Dios Bendishoná nos dushi isla i tur hende ku ta forma parti di nos komunidat.

(For di pagina di Social Media di sr. Eugene Rhuggenaath)