Monday 18 December, 2017

Gobièrnu di Kòrsou ta pidi sindikatonan tempu pa atende ku seriedat

Gobièrnu di Kòrsou, konforme petishon di e Sindikatonan den Akshon a kontesta nan karta entregá awe mainta 9 or promé ku 11 or di mainta. Gobièrnu den su karta a pidi espasio nesesario pa atende na un manera diligente i serio ku e petishon di e sindikatonan.  Gobièrnu komo tal a informá lo siguiente na e Sindikatonan ku Gobièrnu a tuma nota di nan karta entregá 9 or di mainta na Minister President Eugene Rhuggenaath. Awe mèrdia presisamente Gobièrnu tin un reunion di Diálogo Nashonal, den kua e 3 puntonan menshoná, esta suèldu mínimo, oumento di prima di seguro di auto i e situashon na UTS  ta puntonan di deliberashon. Respetando e Protokòl di 6 de febrüari 2014, ku konforme ILO ta reglamentá e diálogo tripartit, gobièrnu ta konsiderá ku mester duna rèspèt na e proseso di diálogo nashonal.

Mientras tantu gobièrnu ta reallisando varios trayekto pa atende ku e puntonan di atenshon ku aktualmente ta den diskushon.  Gobièrnu lo por kontesta e karta di sindikatonan den akshon mas lat awe den un karta por eskrito. Gobièrnu ta bolbe hasi un apelashon na e sindikatonan pa bini na mesa pa por hiba un diálogo sano na bienestar di nos komunidat i trankilidat den nos pueblo.