Monday 25 June, 2018

Gobièrnu di Kòrsou ta spera di por normalisá tráfiko ku Venezuela

Gobièrnu di Kòrsou ta spera i ta hasi tur loke ta na su alkanse pa yega na normalisashon di tráfiko entre nos isla i Venezuela. A base di e medida di gobièrnu di Presidente Nicolas Maduro pa blokia konekshonnan entre su pais i e islanan ABC, for di komienso di mart kompanianan di aviashon a stòp di bula rutanan entre Kòrsou i Venezuela.

Tambe, dia 8 di mart ku a pasa, e outoridat di aviashon di Venezuela, INAC, a saka informashon kaminda ta bisa ku pa un temporada indefiní ta suspendé tur buelo komersial entre Venezuela i Kòrsou, Aruba i Boneiru. Segun e kompania di aviashon Aruba Airlines, tin eksepshon riba e medida aki, emití pa gobièrnu Venezolano, pa e kompania akí pa transporta personanan Venezolano for di Venezuela via Aruba pa Miami, alabes ku tersero destinashon.

Kòrsou mes no tin niun aerolinea ku ta bula riba e ruta di Venezuela. E kompanianan Venezolano a para nan buelonan pa motibu ku e ruta no tabata ekonomikamente rèndabel. Ta tin muchu tiki hende ku por a bula a base di e dekreto di Presidente Maduro. E último kompania ku a sigui bula, Avior, a anunsia delantá ku nan lo a stòp di bula pa 2 di mart 2018. Asina a sosodé tambe. Aruba ta tin muchu más konekshon ku Venezuela i aparentemente Aruba Airlines ta mira e buelonan via Aruba pa Miami ainda komo komersialmente interesante.

Gobièrnu di Kòrsou, meskos ku e otro paisnan den Reino, si ta sigui ku esfuersonan diplomátiko pa mehorá e situashon di moda ku por normalisá trafikashon di hende i produkto entre e paisnan. Mientrastantu e úniko manera pa bai Venezuela ta via di otro paisnan ku si tin konekshon aerio ku e pais. Pa hende ku ke hasi uso di e konekshonnan aki, Gobièrnu di Kòrsou ta konsehá pa no biaha pa Venezuela si no tin motibunan urgente. Hende ku pasport Ulandes pegá na Venezuela por tuma kontakto ku e embahada di Reino na Venezuela, riba number di telefòn +58212-2769300.  Of fuera di oranan di ofisina: +31 247 247 247.