Saturday 26 May, 2018

Gobièrnu ta perkurá pa kombustibel konforme plan pa mitigá emergensia

Gobièrnu di Kòrsou ta enfatisá, ku danki na un plan pa mitigá emergensia prepará i awor aktivá, pueblo di Kòrsou por sigui konta riba produktonan manera gasolin, gas, gasoil, koriente i awa, manera kustumbrá. No opstante e último desaroyonan rondó di PDVSA, Kòrsou no tin problema agudo. Danki na e plan ku gobièrnu a prepará adelantá, pa mitigá konsekuensha i riesgo di e situashon di PDVSA riba komunidat, no tin motibu pa preokupashon.

Gobièrnu a i ta hasi tur esfuerso pa e situashon keda bou di kòntròl. Gobiernu di Kòrsou, bou di enkargo di Minister Eugene Rhuggenaath, a reuní den wikènt ku gerensia di Refineria Isla i sindikatonan ku ta representá trahadónan di Isla. Ámbos reunion a kana den bon esfera. Gobièrnu no ta basilá pa tuma ningun paso, pa garantisá suministro di gasolin, gas, koriente i awa, manera kustumbrá.

Pa medio di un Taskforce di Energia, instituí pa Minister di Asuntu General Eugene Rhuggenaath, Gobièrnu ta sigui e situashon kontinuamente i ta tuma akshon segun e diferente senarionan, manera prepará adelantá. E Taskforce ta formá pa gerenshanan di diferente organisashon den sektor energétiko, manera Refineria di Kòrsou, Curoil, Aqualectra i di representante di varios organisashon di gobièrnu.

Kaminda ta nesesario, Curoil ta kumpra kombustibel riba merkado internashonal pa por kumpli ku nesesidat di e merkado lokal. Curoil den esaki ta usa su barku ˈRed Majesticˈ pa trese e produktonan Kòrsou. Asina ta garantisá ku tin sufisiente produkto, ora ku Refineria Isla eventualmente no por suministrá Kòrsou. Aqualectra tambe a tuma akshonnan nesesario pa garantisá su servisionan konforme e plan di mitigáshon.

Durante e dianan ku ta sigui, lo informá komunidat tokante e desaroyonan ora esaki ta nesesario. Ta úrgi tur hende pa sigui informashonnan verídiko di Gobièrnu i e instanshanan konserní so, pa evitá ku informashon robes ta krea preokupashon inesesario.