Monday 18 December, 2017

Gobièrnu ta sostené ARC den kambio di Lei

Dia 3 di òktober último Gabinete Rhuggenaath a keda sorprendi despues di a tuma nota di un komunikado den korant lokal tokante karta pa Parlamentu di parti Kontrolaria General di Kòrsou (ARC) fechá 29 di sèptember 2017, relashoná ku suspenshon di kaso di kasashon di Pais kontra United Telecommunication Services N.V. (UTS).

Promé Minister Sr. Rhuggenaath ta kere ku ta di sumo importansia pa informá ku ARC a risibí un bishita dia 28 di sèptèmber, durante e kombersashon a amplia tokante e desishon di Konseho di Minister di dia 27 di sèptèmber. E kombersashon aki a fungi komo motivashon pa ku desishon riba e tópiko aki. ARC a ser informá ku Konseho di Minister a ninga e petishon pa kasashon mirando kon kuantioso e gastunan por bira den kaso di un posibel prosedura di korte na Korte Supremo.

Den e kombersashon promé minister a elaborá ampliamente tokante un kambio di lei ku ta duna ARC e oportunidat pa investigá identidatnan riba un distansia den kuadro di integridat i korupshon, di e forma aki por adapta e maneho. I ARC tabata di akuerdo ku e 'Landverordering Algemene Rekenkamer Curaçao' tin algun 'buraku' i ku sierto desishon habri pa mas ku un interpretashon, pues un kambio di e lei lo por ta e mihó solushon.

Prome Minister a duna su sosten pa ku esaki i a konsehá ARC pa inkorporá Departamentu di Asuntunan Hurídiko (WJZ) pa ku e trayekto di lei i pa inisisiá e proseso mas pronto ku ta posibel. E argumentu ku Konseho di Minister ta redusí e independensia di ARC ku su desishon no ta kuadra kompletamente ku realidat, mirando ku a duna ARC pèrmit pa bai Korte Supremo. E desishon di Konseho di Minister ta basá riba un aspekto finasiero, mirando e situashon finansiero prekupante ku nos pais ta aden aktualmente.

Echo ta ku ARC no mester a afiliá na Ministerio di Asuntunan General pa pago di e fakturanan di ofisina di abogado, hasiendo esaki ARC a pone nan propio independensia den kompromiso. Komo un instansia responsabel ARC mester a revisá si nan ta disponé di e medio nan finansiero prome ku entamá un kaso di kasashon.