Saturday 26 May, 2018

Hòmber di 24 aña di edat detené pa intento di asesinato di su èks

Polis a detené sospechoso di intento di asesinato na Seru Fortuna.(komunikado number 056/2018) Djabièrnè 2 di febrüari 2018, alrededor di 00.53 or, Sentral di Polis a risibí notifikashon di un kaso di lòsmentu di bala riba Seru Fortuna. Mesora Sentral di Polis a dirigí un patruya na e sitio. For di un investigashon ku polis a realisá na e sitio polis a komprendé for di un testigu ku un hòmber a lòs algun tiru dirigí riba un dama (su ex) na momentu ku e dama aki a yega kas den un outo. Niun di e balanan no a alkansá e dama, sinembargo e outo ku e dama tabata manehá si a haña perforashon di bala. Despues di su akto e hòmber sospechoso aki a bai for di e sitio. Polis a konfiská e outo i un kantidat di “huls” na e sitio pa mas investigashon.

Kontinuando ku e investigashon den e kaso di intento di asesinato aki, djasabra 3 febrüari 2018 alrededor di 19.10 or, polis a detené e hòmber sospechoso den e kaso aki, C.T.B., nasé na Kòrsou 24 aña di edat den e área di Seru Fortuna. Durante detenshon di e sospechoso aki polis a haña i konfiská un revòlver kaliber 38 ku un kantidat di bala den dje ku e sospechoso
tabatin huntu kuné. A presentá e sospechoso dilanti di un fiskal ouksiliar ku a ordená su enkarselashon pendiente mas investigashon. E investigashon den e kaso aki ta kontinuá.