Monday 25 June, 2018

Hòmber fuma ku a kousa aksidente ku morto ta keda será

E outo ku e hòmber A.H.M.O (fuma) tabata maneha riba e marduga enkuestion.

E outo ku e hòmber A.H.M.O (fuma) tabata maneha riba e marduga enkuestion.

E hòmber A.H.M.O., ku dia 9 di mart 2018 a kousa un aksidente ku morto bou di influensia di alkohòl ta keda será pa mas investigashon. E dia en kuestion R.M.W. a pèrdè su bida den tráfiko riba kaminda pa Fuik riba Kaminda Jose C. Anthonia.

Den aña 2018 ta bai oumentá kòntròl pa alkohòl den tráfiko. Manera konosí ta bin lei pa hasi posibel pa tèst pa uso di alkohòl den tráfiko, hasiendo uso di asina yamá “blaaspijpjes”. Te na e momentu ku e lei keda aprobá ta kuminsá usa e ekipo na sierto okashon i na momentu di sierto kontrol den tráfiko. Na momentu ku polis ta sospechá uso di alkohòl trai stür ta obligá e shofùr pa supla promé ku por sigui riba kaminda. Si ninga pa supla, ta konfiská e vehíkulo. Si supla i nota uso eksesivo di alkohòl ta konfiská e vehíkulo si no tin un persona ‘nuchter’ ku por sigui kore e vehíkulo. Mester presentá un otro persona ‘nuchter’ promé ku kran presentá pa kue e outo. Kasonan di uso eksesivo di alkohòl trai stür lo no keda persiguí tanten ku e lei no ta na òrdu i implementá.

Sinembargo, esnan ku supla positivo riba uso di alkohòl lo keda notá den e sistema di polis. Ku otro palabra, ta nota e trabou ku polis ta registrá den kaso di uso eksesivo di alkohòl. Tene na kuenta tambe ku durante kontrolnan do alkohòl por tin prensa presentá ku ta registrá esaki nan.

Lamentablemente ta konfirmá ku víktima R.M.W. dia 9 di mart no tabata tin su faha di seguridat bistí. KPC i Ministerio Públiko (OM) ta sigui ku akshonnan pa konvensí siudadanonan pa bisti e faha di seguridat. Ta duna informashon al respekto. E but aktual pa no bisti faha di seguridat ta 300 florin. Ta bai duna èkstra atenshon ora di but na mucha ku no tin faha bistí.

A pidi mientrastantu Minister di Tráfiko pa inisiá ku dunamentu di informashon tokante faha di seguridat na skolnan riba Kòrsou pa di e forma aki fo’i yòn ta bira klarito ku mester bisti faha di seguridat den tráfiko.