Friday 17 November, 2017

Konsulta Nashonal Lei Penal i Abusu Seksual djasabra awor 15 di yüli

Bos di Hubentut i Universidat di Kòrsou ta invitá pueblo di Kòrsou pa ta presente Djasabra 15 di yüli na dos evento pa haña informashon, hasi pregunta i duna opinion tokante e kambio di lei ku a tuma lugá na aña 2011 pa krímennan di abusu seksual. Djasabra mainta 10.00-13.00 na UoC tin un konsulta na hulandes ku presentashon di 3 eksperto i despues un pènel pa hasi pregunta i duna opinion. Djasabra atardi 17.00-20.00 na plasa Brion pueblo tin e oportunidat úniko pa duna nan opinion i hasi pregunta na un pènel di eksperto riba tereno di lei i trabou sosial den komunidat. Tambe lo kolektá firma pa entregá na parlamentu pa kambia e lei aki.

Universidat di Kòrsou (UoC) ademas di duna enseñansa na nivel universitario pa hóbennan, tambe ta mira komo nan tarea pa eduká pueblo di Kòrsou i asina kontribuí na un diskushon basá riba argumentunan supstanshá. Pa e motibu aki UcO a uni forsa ku organisashonnan Bos di Hubentut/Aliansa i Fundashon Union ta nos Forsa, pa organisá un evento nashonal ku meta pa informá komunidat i tambe tende e opinion di komunidat tokante e lei en kuestion.

E diferente organisashonnan tras di e dos eventonan aki a tuma nota resientemente di un kaso di abusu seksual ku a hala atenshon di komunidat pa e kastigu abou ku e akusado a risibí. Huntu ku e kaso aki tin hopi mas kaso di abusu seksual pendiente i ta asumí ku tin hopi kaso deskonosí tambe. Na aña 2011 ya a entrega 17.000 firma na parlamentu di Kòrsou pa tene kuenta ku e kambio di lei aki i su konsekuensianan pero sin resultado.

Pa e motibu aki, e organisadónan ta urgí pueblo di Kòrsou pa bini i demostrá na grupo grandi ku pueblo ta malkontentu i ke mira kambio. Komunidat ta haña e oportunidat úniko pa bisa gobernantenan direktamente kiko pueblo ta pensa i ki tipo di kambio nos ke mira.