Monday 25 June, 2018

Kontròlnan di Sentro di Akshon Kòrsou tabata efektivo i eksitoso

E lansamentu ofisial riba dia 6 di mart di Sentro di Akshon Kòrsou ta kulminashon i konkretisashon di esfuersonan hasí pa partnernan den kadena hudisial pa kombatí kriminalidat na Kòrsou. Den e siman aki ya algun di e intervenshonnan di e Sentro di Akshon Kòrsou (ántes konosí komo Taskforce Vuurwapen) a kuminsá duna resultado.

Entrada Hudisial
Kombatimentu di uso ilegal di arma i droga ta dos di e temanan kardinal den e trabounan di Sentro di Akshon Kòrsou. Pa e motibu aki djárason 7 di mart 2018 den oranan tempran di mainta e Divishon di Krímen Organisá huntu ku Atrako Team, UST i Team di Aresto a organisá un akshon dirigí riba algun persona i lokalidat kaminda tabatin sospecho fuerte di presensia di arma di kandela i/òf munishon. En konekshon ku esaki a tene entrada hudisial na seis diferente kas i a drenta hasi investigashon. Durante di e investigashon na un di e kasnan, den área di Jandoret Polis a bin topa ku un pistol kargá ku bala skèrpi i a konfiská esaki i hasi detenshon. Na un otro kas den e área di Steenrijk polis a haña i konfiská un kantidat di 61 gram di kokaina, 353 gram di mariwana i 16 gram di hash. Aki tambe a hasi un detenshon.

‘Road Block’
Aparte di e entradanan hudisial aki, dia 5 di mart último a tene diferente kòntròl estilo ‘road block’ riba kayanan di Kòrsou. A organisá dos punto di kòntròl; unu den área di Hato i unu na Corrieweg. E kòntròlnan a tuma lugá entre 6 or’ di atardi i 12 or’ di anochi. Durante e akshonnan aki a kontrolá un total di 197 vehíkulo i 440 persona riba poseshon ilegal di arma di kandela. Den e kaso aki Polis a detené dos (2) hòmber sospechoso pa violashon di Lei di Opio i tambe un (1) dama ku no tabatin e dokumentunan nesesario pa por permanesé riba nos isla. E intervenshon aki tabata un koperashon entre personal di Kuerpo Polisial, konhuntamente ku CurMil (Curacaose Militie), KMAR i Douane. Di e forma aki Sentro di Akshon Kòrsou lo kontinuá ku intervenshonnan na diferente forma pa asina kombatí krímen. Partnernan den kadena hudisial lo sigui den estrecho koperashon ku otro ku kòntròlnan riba kaya i otro akshonnan dirigí pa stroba kriminalnan di funshoná. Pueblo tambe por kontribuí ku e esfuersonan dor di informá i mèldu serka outoridatnan konserní den kaso ku konstatá ilegalidat òf aktonan kriminal. Tene kuenta ku por hasi esaki di forma anónimo riba telefòn 108.