Friday 17 November, 2017

Kòrsou anfitrion di e próksimo JVO na 2018

E Justitieel Vierlanden Overleg (JVO) ku ta tuma lugá kada seis luna entre Ministernan di Hustisia di e kuater paisnan Kòrsou, Sint Maarten, Aruba i Hulanda (representando a la bes e islanan BES), e biaha aki tabata na Sint Maarten dianan 10 i 11 di yüli. Aki ministernan Stef Blok (Hulanda), Arthur Dowers (Aruba), Rafael Boasman (Sint Maarten) i Quincy Girigorie (Kòrsou) kompañá pa nan respektivo delegashonnan a bini huntu pa elaborá riba vários tema di importansia pa e tereno hudisial.

Temanan di atenshon
Durante e reunion a trata entre otro e relashon i koperashon entre e paisnan den Reino riba diferente área manera imigrashon, kriminalidat ku ta krusa frontera, régimen di detenshon i kombatimentu di terorismo. A atendé tambe plannan anual, presupuesto i kuentanan anual di sierto órganonan hudisial manera Korte Komun di Hustisia, Ministerio Públiko i ‘Raad voor de rechshandhaving’.

Evaluashon di RST
Un tema relevante ku a keda tratá un biaha mas durante di e JVO na Sint Maarten ta e evaluashon di RST. Durante di e reunion e ministernan di Sint Maarten i Kòrsou a ekspresá e nesesidat pa e evaluashon aki tuma lugá. Den kaso di Kòrsou, RST tin un bon relashon di trabou ku kuerpo polisial lokal KPC i otro partnernan den e kadena hudisial. Sinembargo ta importante pa evaluá e funshonamentu i koperashon. Evaluashon no nesesariamente ta algu negativo pero mester wak kiko mester por keda ahustá pa e koperashon por ta optimal. Fortifikashon di e kuerponan lokal den nan funshonamentu ta di sumo importansia. Nos kuerponan ta funshoná ku medionan finansiero i personal limitá i ta usa un enorme kreatividat pa por resolvé e situashon aktual di kriminalidat. Intenshon di koperashon entre e paisnan ta pa un yuda i fortifiká otro. Pa e motibu aki evaluashon di e funshonamentu di RST, di su aporte na mantenshon di orden i kombatimentu di kriminalidat den nos pais i su sosten na nos kuerpo lokal ta nesesario.

Interkambio di datonan di DNA
A trata tambe e tema di interkambio di datonan di DNA i protekshon di privasidat di personanan di kua nan profil di DNA ta keda kompartí entre e outoridatnan hudisial. Den e kaso aki Hulanda i Sint Maarten a firma un akuerdo. Minister Girigorie di Kòrsou a splika di ta mira importansia di un akuerdo asina, pero a opta pa ainda no firma un akuerdo, debí ku mester evaluá esaki debidamente, teniendo kuenta ku e leinan vigente en kuantu privasidat na Kòrsou.

Akuerdo tokante Trafikashon di Hende
Kòrsou a logra un adelanto riba e tema di trafikashon di hende (mensenhandel/mensensmokkel) ya ku despues di un gran esfuerso di empleadonan públiko i partikularmente e departamentu di maneho di Hustisia, Kòrsou su ‘Plan van aanpak Mensenhandel/Mensensmokkel’ a keda akordá pa Konseho di Minister di tal forma ku minister di Hustisia, señor Girigorie por a firma esaki na final di e JVO.

JVO 2018
E reunion di JVO a kana den un bon esfera i minister Girigorie ta satisfecho ku e logro i stapnan pa ku koperashon den Reino pa loke ta trata Hustisia i Seguridat. Den e siguiente JVO lo sigui elaborá riba algun di e temanan ku ya a bini dilanti den e JVO aki. Un di e temanan aki lo ta e resultado di aktividatnan di e ‘afpak team’, esta e tim ku ta konfiská propiedatnan ku a keda atkerí na forma ilegal i partikularmente pa medio di aktonan kriminal. Aki minister Girigorie lo trese un presentashon di e aktividatnan i logronan di e tim aki na Kòrsou. Dianan 15 i 16 di yanüari 2018 Kòrsou lo ta anfitrion di e próksimo JVO.