Saturday 23 September, 2017

Lo atendé retraso den petishonnan di pèrmit pa konstrukshon

E tim ta bai traha 3 luna intensivamente pa atendé e retraso kompletu ku tin.

E tim ta bai traha 3 luna intensivamente pa atendé e retraso kompletu ku tin.

Servisio pa Planifikashon Urbano (ROP), ántes D.R.O.V., ta informá komunidat ku entrante 9 di mei 2017 a instituí un tim di eksperto ku ta bai atendé ku tur retraso den petishonnan di pèrmit pa konstrukshon.

E tim ta bai traha 3 luna intensivamente pa atendé e retraso kompletu ku tin i lo sigui traha mas segun esei ta nesesario. Komo parti di e tim aki, tin ekspertonan di ROP, un hurista i un eksperto di pafó. E tim ta bou di guiá di e hefe interino di ROP, sra. ir. C. Cecilia.

Huntu, e tim lo usa su kapasidat i konosementu i ta bai evaluá tur petishon a base di e leinan vigente, manera entre otro ‘Bouw en Woning Verordening (BWV), i ‘Eilandelijke Ontwikkelingsplan’ (EOP). E tim lo konsehá tambe riba un proseso mas optimal pa evitá ku retrasonan ta sigui tuma lugá. E tim ta konta ku e kolaboradónan di komunikashon di staf ministerial di Ministerio.

ROP ta e organisashon di Gobièrnu ku ta sòru pa uso sostenibel i balansa di e espasio di Kòrsou. ROP ta evaluá petishonnan pa desaroyonan urbano nobo i situashonnan aktual pa sòru ku nan ta kumpli nivel di kalidat ku e maneho di Gobièrnu ta stipulá. E responsabilidat di ROP ta konsistí di ordená i duna forma na e espasio públiko di Kòrsou. ROP ta forma parti di Ministerio di Tráfiko, Transporte I Planifikashon Urbano (VVRP) kual ta bou di enkargo di Minister Cordoba.

ROP ta pidi tur persona ku a entrega un petishon i ku no a risibí su kontesta den e tempu stipulá, un diskulpa pa e inkumbinensia. Den último tempu diferente trahadó a baha ku penshun loke ta okashoná ku ROP ta konta ku eskases di personal. Pa mas informashon por tuma kontakto ku ROP via di email info.vvrp@gobiernu.cw.