Monday 18 December, 2017

MD di Insel Air ta operashonal pa biahenan komersial  

Djarason 11 di òktober 2017, Insel Air huntu ku Outoridatnan di Aviashon Sivil a logra tur reglamentario obligatorio pa sertifikashon di e avion MD (MDI). E ultimo buelo ku tabata nesesario pa finalisá e outorisashon tabata eksitoso. Pa e ultimo lunanan, Insel Air tabata bula entre islanan ABC i Sint Maarten ku un avion Fokker 50. Agregashon di e MD na e fleta di Insel Air ta un paso importante ku lo hiba e kompania na mas stabilidat finansiero den futuro. Pronto pasaheronan lo nota ku Insel Air ta kuminsá bula su destinashonnan akustumbrá bèk. Esaki lo tuma lugá gradualmente. E MD por akapará  145 pasahero i ta kuminsá bula djaweps 12 di òktober diariamente entre Kòrsou i Sint Maarten. E buelo ta sali for di Kòrsou 09.15 i e ta yega Sint Maarten 10:45. Di regreso e buelo ta sali Sint Maarten 11:45 i e ta yega Kòrsou 13:15. Insel Air ta gradisí Outoridatnan di Aviashon Sivil i tur empleado di Insel Air ku tabata enbolbí den e proseso ekstenso pa hasi e MD operashonal bèk.