Tuesday 20 February, 2018

Medio di komunikashon a usa 'voice note' di polis eróneamente

Djasabra 10 febrüari 2018, Kuerpo Polisial a tuma nota ku un kanal di televishon a pone den su titular di notisia di anochi ku nan a papia ku un agente polisial ku tabata involví den un insidente resientemente. Porsierto e insidente aki ta bou di investigashon i otro siman ta bin bèk riba resultado di e investigashon.

Na momento ku e kanal aki a pasa e ‘item’, a hasi uso di un ‘voice note’ di e kolega aki den notisia kreando konsientemente e impreshon robes komosifuera tabatin un entrevista ku e agente polisial. Sinembargo ta trata aki di un ‘voice note’ ku e kolega aki a manda den un grupo di whatsapp privá di koleganan ku e meta eksklusivo pa e informá e grupo aki. Pa un motibu ku te na e momento aki no ta konosí e ‘voice note’ aki a bin resultá na e kanal di televishon aki. E kanal di televishon a publiká esaki sin outorisashon di e persona ku a produsí e ‘voice note’. Na ningun momento e agente polisial aki no tabatin ningun entrevista ku personal di e kanal di televishon i ta kondenabel ku ta anunsiá i pasa e ‘voice note’ aki na e kanal enkestion i asina krea un impreshon ku ta un entrevista a tuma lugá. Naturalmente ora un hende ekspresá su mes den un seno di kolega i amigu ta otro for di un entrevista na un medio di komunikashon.

Sakando e ‘voice note’ di e manera aki komo un entrevista ku e manera di ekspresá su mes den un seno privá manera e kolega aki a hasi, naturalmente ta krea un imágen dañino pa tantu e kolega pero tambe pa Kuerpo Polisial Kòrsou.
Konsekuentemente nos ta repudiá e manera di proseder aki. Kuerpo Polisial a tuma kontakto ku hefe di redakshon di e kanal aki i a komuniká e repudio aki klaramente.