Saturday 23 September, 2017

Minister di Telecomunicacion: A yega asina leu pa cera MIO Aruba

Durante un entrevista cu Minister Richard Arends, el a duna su comentario riba e situacion di Mio Aruba. E ta un situacion cu e mes ta haya desafortuna cu mester a yega asina leu, pero na momento cu un empresa cu ta explota un red di celular e debe cu pais Aruba ta asina halto y no tin miras pa yega na un solucion satisfactorio, e ora den interes di bienestar general y di pais Aruba, e minister a haya su mes obliga di trek in e licencia di Mio pa un debe di rond di 15 miyon di florin. Ta un proceso cu ya caba a cuminsa for di aña pasa. No ta algo di e aña aki y cu awe a yega na e punto culminante.

Basicamente e sistema di e licencianan pa haci uzo di e netwerk ta consisti di dos parti. E prome parti ta un concesion di 7.2 miyon florin cu ta paga cada 10 aña y riba esey tin cada aña tin e sumanan periodico cu tin cu paga. Obviamente Mio tin 8 aña na Aruba, pero e Venootschap cual e doñonan di Mio a adkiri, cual ta un compania cu tabata existi for di 2003, a cumpli parcialmente cu nan debe, a cumpra un empresa cu ya tabata tin dos of ta tres aña di concesion bieu, cu a caduca na 2014, cu tabata falta pa paga y a falta pa paga tambe e concesion nobo cu a inicia na 2014, tabata falta e suma di 7.2 miyon, como tambe e sumanan periodico pa e añanan 2014, 2015, 2016 y 2017. Esey den total ta yega na un suma di 15 miyon.

Arends a purba di yega na un comprondemento e tempo ey, su obhecionnan. Obviamente tabata tin casonan den corte tambe y di es manera mester a warda tambe pa e casonan den corte finalisa y den e casonan mes pais Aruba semper a haya rason di hues y p’esey por a inicia e proceso di desconexion di e netwerk mobil.