Saturday 23 September, 2017

MinPres ta partisipá na High Level Political Forum na New York

Dia 10 di yüli te ku 19 di yüli na New York lo bai tin e High Level Political Forum (HLPF), un foro riba e nivel politiko mas haltu di Nashonnan Uni (UN) tokante e Agenda 2030, un agènda global ku Sustainable Development Goals (SDGs) adoptá na sèptèmber 2015 dor di UN. E último dos dianan (17-19 yüli) lo tin e reunionnan ministerial kaminda Promé Minister Rhuggenaath tin e honor di akseptá un invitashon pa partisipá huntu ku Minister Ploumen (Relashonnan Internashonal i Koperashon pa Desaroyo - Hulanda) i Promé Minister William Martin di Sint Maarten. Kòrsou a kompremeté su mes pa ku e "Agenda 2030", manera stipulá den nos Plan Nashonal pa Desaroyo (NDP) i ya a logra desaroyonan riba e tereno di implementashon di e Sustainable Development Goals (SDGs).

E foro politiko riba nivel haltu aki ta e podio sentral di Nashonan Uni, kaminda ta duna follow-up í revisá e 2030 Agenda pa loke ta trata desaroyo duradero í e sustainable development goals (SDGs). E tema di e foro e aña aki ta "Eradikashon di pobresa í promové prosperidat den un mundu kambiando" i ta pesei mes ta importante pa Korsou ta presente, ya komo ku Gabinete Rhuggenaath tin esaki komo un prioridat den su Plan di Gobernashon pa Korsou. 

Durante e konvenio lo interkambiá prinsipalmente riba e SDGs nan, pues kon: ta pone un fin na pobresa (SDG 1); ta pone un fin na hamber (SDG 2); ta biba salú (SDG 3); ta alkansá igualdat di genero, empoderá hende/mucha muhenan i promové inklusion (SDG 5); ta konstruí infrastruktura resilient, í kultivá inovashon (SDG 9); i ta konservá nos laman, osean i rekurso marino na kaminda pa desaroyo duradero (SDG 14). Mayoria di e prioridatnan aki mester di atenshon agudo den nos país i akshonnan pa halsa kalidat di bida pa kada un suidadano na Kòrsou, kual ta e ophetivo prinsipal di e Gabinete aki. E posibilidat pa partisipá i asina probechá di tur e benefisionan ku UN ta fasilitá kiermen ku komo país nos por interkambiá, sigur ku otro islanan ku perspektivanan similar (Small Island Developing States) i atkerí ekspertisio pa atendé ku retonan, manera desaroyo ekonómiko i kombatimentu di pobresa ku den e próksimo periodo di gobernashon lo atendé.

Promé Minister Rhuggenaath su partisipashon na HLPF ta profilá Kòrsou su posishon komo un lider trahando riba desaroyo sostenibel den e region i ta habri kaminda pa Kòrsou por kontinuá na traha riba lasonan bilateral dentro di Reino Hulandes, den region i tambe internashonal.

Riba e biahe aki Promé Minister Rhuggenaath lo ta akompaña pa e hóben Eunice Dolorita komo representante di Konseho di Hubentut di Kòrsou. Eunice ta un studiante di UoC i lo djòin otro representantenan hóben di otro parti di Reino Hulandes. Esaki ta e promé biaha ku Kòrsou ta manda un representante hóben komo parti di e delegashon. E hóbennan di Konseho di Hubentut a inkorporá e SDGs den nan aktividatnan relashoná ku maneho pa desaroyo di hubentut na Kòrsou. Promé Minister Rhuggenaath ta sumamente entusiasmá di por hiba un di nos hóbennan pa eksperensiá i representá Kòrsou na un foro di e nivel aki. Minister Presidente ta di opinion ku mester habri kaminda pa fasilitá partisipashon di hubentut den desaroyo di nos país.