Saturday 26 May, 2018

Morto den tráfiko na Kaya Mitologia

Djadumingu 6 mei 2018, alrededor di 21.21 or Sentral di Polis a haña notifikashon ku riba Kaminda Mitologia, un aksidente di tráfiko a tuma lugá entre dos (2) vehíkulo. Na yegada di e patruya polisial na e sitio nan a bin topa ku un hòmber den un di e vehíkulonan, ku no tabata duna señal di bida. For di un investigashon preliminar ku polis a realisá na e sitio a resultá ku shofùr di un (1) pikòp tabata koriendo riba e kaminda ariba menshoná biniendo for direkshon di Sta Catharina. Dado momento e shofùr aki a kita riba su man kontrali i a bai dal ku su pikòp na e banda robes di e outo blou ku tabata biniendo for di direkshon di Beurs. Dor di e impakto aki e shofùr di e outo blou a risibí múltiple leshon i a fayesé na e sitio di aksidente.

Alrededor di 22.45 or, dòkter di polis a konstatá morto di e víktima, e hòmber Otmar Vicente Francisca nasé na Kòrsou, 19 di yüli 1973. Ambulans a transportá shofùr di e pikòp pa polikínika di SEHOS pa tratamentu médiko. Su situashon ta di prekupashon. Departamento di Tráfiko ta kontinuá ku e investigashon.