Monday 25 June, 2018

Notisia Polisial Boneiru: Aksidente, ladronisia, kachó brabu i mas

Riba djaluna 12 di mart pa mas o ménos 7 or di mainta un aksidente entre dos outo a tuma lugá riba Bulevar Gobernador Debrot. Un outo ku tabata biniendo for di direkshon di Playa, bayendo den direkshon di Sabadeco, diripiente a kita bai na su man drechi. Un outo ku tabata biniendo for di direkshon kontrali, mester a wela bai na su man drechi dor di esaki i a bai dal den un palu. Ambulans a transportá ámbos shofùr pa hospital pa tratamentu médiko.

Riba djadumingu 11 di mart sentral di polis a risibí notifikashon tambe di 5 kachó agresivo ku tabata kana los i ku tambe nan a mester a mata dos otro kachó, den besindario di Kaya J.E. Nicolaas. Tambe nan ataka dos dama ku tabata pasa ei banda. Na yegada di patruya e kachónan a ataka e outo di polis tambe, despues di kua 4 kachó a drenta e kura bek i 1 a keda para pafó i tabata reakshoná agresivo riba e polisnan. Mester a tir’e na e sitio mes. Kura do e doño tabata un desaster, loke probablemente e kachónan a okashoná. Mirando esaki i e agresividat di e kachónan a disidí pa manda e kachónan pa otro mundu. Dòkter di bestia a bini i pasa e sobra 4 kachónan un angua pa esaki.

Riba e mesun dia tambe a drenta keho di ladronisia di skuter, tipo ‘Puch’, for di un kompleho di apartamentu situá na Bulevar Julio A. Abraham. E skuter tabata stashoná, na lòk ku un lòk di kadena, riba e sitio pa stashoná di e kompleho. E ladronisia a tuma lugá entre djasabra 10 di mart, pa mas o ménos 5.45 or di atardi i djadumingu 11 di mart, pa mas o ménos 7 or di mainta.
Mas lat riba e dia a drenta keho tambe di ladronisia di un ‘mountainbike’ kolo pretu ku aksèntnan kolo oraño, di marka TG, modelo Timberline. E baiskel ku no tabata na lòk, tabata stashoná na kura di un kas situá na Kaya Finlandia. E ladronisia a tuma lugá riba djasabra 10 di mart entre 9 or i 12 or di anochi.

Riba djasabra 10 di mart sentral di polis a risibí notifikashon di kandela na un garashi situá na Kaya Industria. Na yegada e patruya a konstatá un seru di tayer ku tabata na kandela. Probablemente e kandela a surgi dor di un drùm di zeta den kua tabata kima sushi. Dor di e bientu duru e kandela a sali di drùm pasa ofer pa e tayernan. Brantwer a bin na e sitio i a paga e kandela. No tabatin herido.

Riba e mesun dia un aksidente entre un outo i un bròmer a tuma lugá riba Kaya Thomas M. Marchena. E shofùr di a bròmer a sufri leshon na su man i pia i a transporte ku ambulans pa hospital pa tratamentu médiko.

Riba djaweps 8 di mart den oranan di atardi a mèldu na polis ku un pareha a bai snòrkel den área di Black Durgeon (Hato) i e hòmber a yega bèk tera pero e señora no a regresá. KPCN ku yudansa di Warda Kosta, Stinapa i Havenkantoor a inisiá mes ora un búskeda riba laman. Banda di 9or di anochi polis a stòp e búskeda aktivo di e señora aki. Ta trata aki di un señora di 83 aña di edat di nashonalidat merikano. Riba djabièrnè, 9 di mart, den oranan di atardi KPCN a haña konfirmashon ku e kurpa sin bida ku a haña awe mainta riba laman den área di Karpata ta trata di e señora merikano di 83 aña di edat ku a bai snòrkel ku su partner i no a regresá. Despues ku e defuntu a keda identifiká i investigashon a terminá a entregá e kurpa na famia.