Friday 17 November, 2017

Notisia Polisial: Ladronisia, Kiebro, Aksidente i mas

Riba djaluna 5 di yüni pa mas o ménos 1 or di mardugá a detené un hòmber di inisialnan L.E.C. na un kasino situá na Bulevar Julio A. Abraham en konekshon ku kiebro di pas lokal, buracheria i pa no sigui órden di polis.

Riba djadumingu 4 di yüni, den oranan di mainta, a drenta keho di ladronisia di un pòtmòni for di den un outo. E ladronisia a tuma lugá entre 4 or i 5. 30 or di atardi. Komo ku e doño di pòtmòni a pasa vários sitio ku e outo, no ta konosí na unda presis a bai ku e pòtmòni. Algu mas lat riba e mesun dia a drenta keho di ladronisia den un kas situá na Kaya Venus. A bai ku entre otro un iPhone 6s kolo blanku i sèn kèsh. E kiebro a tuma lugá entre 5.30 or di atardi i 7 or di anochi ora e habitante tabata drumi. Den oranan di anochi a drenta un mas keho di kiebro. Den un kas situá na Kaya Krisolito a kibra drenta entre 6.45 or di atardi i 8.45 or di anochi. For di aki a bai ku entre otro joya i un tablet.

Riba djasabra 3 di yüni a drenta keho di ladronisia di un skuter kolo kòra di marka Gilera Runner. E skuter , ku lòk di stür, tabata stashoná riba pòrch di un kas situá na Kaya Karana. E ladronisia a tuma lugá entre 2 or di mardugá i 6.45 or di mainta. Den oranan lat di atardi, pa mas o ménos 6.15 or di atardi, un aksidente entre dos outo a tuma lugá riba Bulevar E.E.G.Un pikòp tabata bek pa Sali for di un lugá di stashoná di un kompleho di apartamento, miéntras un outo tabata bayendo den direkshon di Playa for di Pink Beach. E outo aki no por a desviá i a dal den e pikòp ku tabata bek. Shofùr di ámbos vehíkulo a keda herida; shofùr di e pikòp tabatin doló na su skouder i kabes i shofùr di e outo tabatin un doló na su garganta i un kap na su lep. A transportá e víktima aki huntu ku dos mucha ku tabata den outo huntu kuné pa hospital pa kontrol médiko.

Riba djabièrnè 2 di yüni pa mas o ménos 4 or di atardi un aksidente entre un skuter i un pikòp a tuma lugá riba Kaya Grandi. E pikòp kier a lora i no a mira skuter ta bin ku konsekuensia ku e skuter a dal den e pikòp. Shofùr di e skuter a keda herida na su kabes i ku ambulans a transporte pa hospital pa tratamentu i kontrol médiko.

Riba djaweps promé di yüni a drenta keho di ladronisia di un kámara di saka potrèt kolo pretu di marka Canon for di un outo ku tabata stashoná na e sitio di sambuyá Tolo. E ladronisia a tuma lugá entre 11 or i 11.45 or di mainta ora ku e doñonan tabata sambuyá. Mas lat, pa mas o ménos, 12 or di mèrdia, a detené un hòmber di inisialnan J.M.A.H. i un hòmber di inisialnan R.E.N. ora gara nan kla pa bai hòrta den un kompania di konstrukshon situá na Kaya Industria Pariba.