Thursday 19 April, 2018

OM: Detenshon di shofùrnan ku repetidamente ta kibra lei di tráfiko

Kore sin seguro bálido riba karetera públiko di Kòrsou ta un problema grandi. For di sifranan di Ministerio Públiko (OM) Kòrsou ta sali na kla ku na 2017 un total di 4.375 outomobilista a risibí un prosèsverbal pa motibu ku nan no por a mustra nan seguro bálido di outo riba e asina yamá “eerste vordering”. Ta tratá di 3.896 violadó den tráfiko. Ta nifiká ku tin violadó den tráfiko ku na mas ku un okashon den 2017 a risibí un prosèsverbal pa e mesun hecho kastigabel. Residivismo ta pues hopi haltu.

KORE SIN SEGURO
For di e reportahe di OM ta sali na kla ku 3.488 outomobilista den 2017 a risibí un pv pa kore nan vehíkulo sin seguro bálido. 350 outomobilista a risibí den 2017 dos pv pa kore vehíkulo sin seguro bálido. 47 Outomobilista a risibí 3 but, 9 a risibí den 2017 4 but i 2 outomobilista a risibí 5 but pa e mesun hecho.

Konklushon ta ku en todo kaso 408 outomobilista ta kore riba kaya sin seguro bálido miéntras ku nan a risibí 2 pv kaba pa e hecho aki. Di e sobra grupo no por duna mas informashon, komo ku bien posibel nan ta kore ainda sin seguro bálido, pero no a keda gará ainda pa polis.

REIBEWEIS
Den 2017 polis a skibi 6.599 but pa no por a mustrá un reibeweis bálido riba “eerste vordering”. Ta trata di 5.277 violadó den tráfiko. Den e segmento ai tambe a registrá hopi residivismo. Di nan 957 outomobilista a risibí 2 òf mas but pa kore sin reibeweis bálido.

Ministerio Públiko Kòrsou ya kaba for di medio 2017 ta atendé fuerte kontra residivismo den tráfiko ora ta trata esnan ku ta kore sin reibeweis bálido i na unda ta hasi den Korte un demanda kastigu di prisòn pa e sospechoso.

Fiskal di Ministerio Públiko, enkargá ku asuntunan di tráfiko, a disidí awor pa amplia e maneho di residivista pa tambe esnan ku ta kore repetidamente outo sin un seguro bálido pa nan vehíkulo.  Nan tambe por ferwagt den Korte un demanda pa un kastigu di prisòn.

KPC i OM ta bai nota awor e doño di e outo den kual e delitonan aki ta ser kometé. E doño di e vehíkulo ta kore e riesgo ku t eksigí den Korte pa “verbeurd verklaring” di e vehíkulo si ta sali na kla ku e vehíkulo ta mas biaha riba karetera públiko sin ku ta kumpli ku e eksigensia di reibeweis òf seguro bálido.