Friday 18 August, 2017

Oportunidat prometedor pa un mishon ekonómiko na Canada

Ministerio di Desaroyo Ekonómiko (MEO) den estrecho koperashon ku Rijksdienst voor Ondernemend Nederland lo tuma parti na un Mishon Ekonómiko ku lo tuma lugá próksimamente na Toronto i Vancouver, Kánada. E mishon aki lo tuma lugá for di 2 te ku 6 di Òktober i empresanan lokal den sektornan di sektor di Life Sciences & Health, Agri-Food & Horticulture i sektor di utilidat tin e oportunidat pa partisipá.

Meta prinsipal di e mishon ekonómiko ta pa fortalesé posishon di empresanan lokal i esnan Ulandes riba merkado Kanadiense. Kánada ta wòrdu mirá komo un provedor di solushonnan kreativo i inovativo riba tereno di agrikultura, kuminda, infrastruktura i salubridat. Pa medio di e mishon aki empresanan lokal den e sektornan ariba menshoná lo risibí e oportunidat pa brinda solushon den problemátikanan ku Kánada aktualmente ta sintá kuné. Esaki ta inkluí entre otro problemanan di  inundashon, suministro di alimento, embeyesimentu, subida di gastunan di kuido i kambio di klima.

Promové kolaborashon entre empresanan lokal i Ulandes i Kánada i ampliashon di posibilidatnan di invershon na Kánada ta pará sentral durante e mishon ekonómiko aki. E mishon aki ta konsentrá su mes na Toronto, kaminda un programa empresarial lo keda ofresé na tur empresa partisipante i na Vancouver lo tin un programa adishonal riba e tema di ‘Resilient Cities’ kual ta nifiká desaroyo urbano riba tereno di suministro di awa, planifikashon di siudat i infrastruktura. E programa di e mishon ta proveé matchmaking mará na seminarionan temátiko. Aparte di esaki lo tin aktividatnan pa ‘netwerk’ ku otro empresanan i lo organisá bishita na diferente empresanan di interes.

MEO ta dispuesto na kordiná e mishon aki i ta hasi un yamada na empresanan lokal i Ulandes den e sektornan menshoná pa inskribí i partisipá den e mishon aki. Empresanan interesá mester ta inskribí na Kámara di Komersio. Kada empresa partisipante lo mester kubri su propio gastunan di biahe i estadia i gastunan di partisipashon. Partisipashon ta kosta €950,- pa empresa (ku un máksimo di 2 representante). Pa kada representante èkstra ta bini un montante di € 475 pa persona. Den un afan pa stimulá partisipashon di empresarionan femenino lo tin un deskuento di 50% riba e kontribushon di partisipashon pa e grupo spesífiko aki. E pakete ku ta keda ofresé den e kaso aki ta partisipashon di e empresa den e programa kompleto durante e mishon, menshon di e perfil di e empresanan partisipante den e buki di e mishon komersial aki, transporte i sosten lokal durante e estadia na Kánada.

Empresanan interesá por pidi pa e programa di e mishon i duna nan interes den partisipashon den e mishon aki te ku djárason dia 9 di Ougùstùs próksimo serka drs. sra. Shereeta Ramcharan via 465-0485 (ekst.) 193 òf s.ramcharan@cdi.cw