Monday 25 June, 2018

Panel pa doñonan di pèrmit pa bende kuminda durante karnaval 2018

Departamentu di Higiena Tékniko di UO G&Gz ta organisá dia 20 di yanüari 2018 dos seshon di informashon pa futhèndlernan riba e tópiko di higiena relashoná ku benta di alimentu durante aktividatnan di e.o. karnaval i seu 2018. Tur doño di pèrmit mester registrá. E seshon di informashon ta bai ta den un forma mas interaktivo ku e doñonan di stènt kaminda ku e personal di THZ ta duna informashon den forma di un pènel. Entre otro lo trese dilanti puntonan di atenshon ku a keda konstatá atraves di añanan di kontròl.

Tambe ta bai trata puntonan di riesgo manera kómpra, warda, preparashon, transporte, higiena personal i benta di alimentu, huntu ku konstrukshon di e stènt mes. Tur esaki ta pa minimalisá e riesgonan di kontaminashon i garantisá más tantu posibel ku e alimentu lo keda presentá mas saludabel posibel serka e konsumidó. Ta un hecho ku e kondishonnan bou di kual e proseso di benta ta tuma lugá no ta esun di mas adekuá i ta motibu di gran atenshon pa tantu e bendedó i e públiko ta bon informá pa nan por tuma desishonnan korekto i na tempu. Lo bai tin dos (2) seshon riba 20 di yanüari 2018, kual ta un djasabra. Esaki pa evitá ku doñonan di stènt a hañanan strobá pa partisipá pa motibu di trabou manera a yega di sosodé den pasado.

Fecha : 20 di yanüari 2018
Lugá : Sala di Kapèl na UO G&GZ (ántes GGD), Zakitó
Orario : 09.00 pa 10.30 ‘or i 11.00 pa 12.30 ‘or
Partisipante : Doño di pèrmit (1 persona)


Pa inskripshon esaki por di djaluna 15 di yanuari na 4322867 durante orario di trabou te ku djabierne 19 di yanuari te ku 11or di mainta. Ta bon pa enfatisá ku tur hende ku ta atendé ku alimentu mester tin un karchi di kùr bálido i lo pasa na e adrèsnan pa wak e kondishon bou di kual e preparashon lo tuma lugá. Pues e personanan mester inskribí na tempu pa por bini na remarke.

Dia- i oranan di inskribí pa pasa eksamen ta:
Djaluna te djarason di 07.30 pa 09.30 ‘or. Mester paga Fl. 50, – i presentá ku un pasfoto resién i tambe un forma legal di identifikashon manera sédula, pasport òf reibeweis.