Sunday 23 July, 2017

Posishon di Asosashon di Pastor (APK) riba matrimonio di mesun sekso

Tin un diferensia entre Homoseksualismo i Matrimonio Homo. Ta berdat ku tin otro komportashonnan immoral den nos komunidat manera adulterio i fornikashon, pero niun hende no ta purbando pa legalisa esaki. E peliger enorme di legalisashon ta ku si bo bisa A, bo tin ku bisa B, C, D, ets. Legalisashon di homoseksualismo den forma di matrimonio (A) lo trese ku bo no por stop tres hende ku ke kasa (B) ku e mes un argumento ku ta amor. Lo bo no por stop lesnan na skol pa normalisa homoseksualismo (C) bou di e mesun preteksto di no mag deskrimina. Nos huntu (98%) lo mester pensa si e 2% di homoseksualnan den nos pais mester por determina kiko lo hiba na felisidat pa nos tur (D) i kiko lo bira no solamente legal, pero normal (E) den nos pais.

Ya kaba tin un mama ku ke kasa ku su yu homber di 22 aña ku el a topa bek despues di a dune pa adopshon dia e tabata beibi. A base di kua arumento nos lo ke ninga nan ‘felisidat’ (F) Of esnan di otro pais ku ke inskribi na Korsou ku 3 muhe (G) Un mucha mester di mama ku tata (algu ku ta hasi falta kaba) pa e tin mas chens di ta eksitoso den bida. Kon nos lo por ninga pareha den Matrimonio Homo pa adopta yu? (H)
Ya kaba estudionan ta mustra ku yunan lanta den kas di homo ta eksperensia 4 biaha mas relashon homo nan mes. (I) Pa no papia mes di e mayornan di kual tur dos, pero sigur unu no ta su mayor biologiko, ku ta mishi of abusa di e yu adopta. Pa e motibu ei tin biaha tur dos ta abuza di dje. (J) Si nos sigui menshona tur konsekuensianan ku legalisashon di un komportashon seksual asinaki lo trese ku ne, lo no sobra letter di Alfabet pa indika kada un. E afkortingnan di e tantisimo desviashonnan seksual mes ta un indikashon kaba: LGBTTQQFAGPBDSMNC2SAP

Nos antepasadonan sabiendo e historia prome ku nan tempu, tabatin asina mal eksperensia ku homosekualismo (i poligamia; kasa ku mas muhe) ku nan a ankre pa nos den ley di tal manera ku e tabata kastigabel i/of mester a haña yudansa mental. Prome ku nos kita un heki di kura, laga nos pensa bon dikon den pasado nan a pone.

Asosashon di Pastornan Kristian (APK) kontinuamente ta predika un moralidat haltu, yuda esnan den nesesidat, esnan atrapa, adiktonan, werfano i biudanan, pero e ley di matrimonio homo (no homoseksualismo) ta un menasa asina grandi kontra libertad di religion i ekspreshon i ultimamente di felisidat humano, ku no ta keda nada otro pero pa atverti seriamente kontra di e posibilidat ei. Aworaki Korsou tin asina tantu problema serio, ku ni den Parlamentu ni komo referendum no tin prioridat pa esaki.

Direktiva APK