Thursday 19 April, 2018

VIDEO: Promé barku di fruta a yega

Tabata algu promé ku 8or di mainta ku brùg a habri na mitar pa asina e promé barku di fruta drenta haf despues di basta dia ku esakinan no a bini dor ku Venezuela a sera frontera di ABC. El a bin bou guia di Warda kosta i a mara na Kleinewerf. Mesora a kuminsá ku un kontrol grandi di tantu Warda Kosta, Douane, GMN i otro outoridatnan. Den e promé informashon nos a komprondé ke e papelnan dje barku no ta na òrdu i ta deliberando pa mira kiko ta bai hasi. Kònsùl Venezolano tambe tabata presente pa mira esakinan.

Ministerio pa Desaroyo Ekonómiko a partisipá ku entrante  awe djaluna 16 di aprel, barkunan di fruta  for di Venezuela lo yega Kòrsou bek.  Esaki  den kuadro  di e akuerdo ku a yega entre e diferente gobièrnunan di Kòrsou, Aruba , Venezuela i Hulanda pa kita e embargo ku gobièrnu di Venezuela a pone riba e Islanan.

Ta trata aki di 6 barku chikitu ku lo drenta sin ningun produkto, i  2 barku grandi kua lo drenta ku e produktonan. Manera ya a indiká, e barku chikitunan aki lo bai mara na ‘’Kleine Werf’’.  Si resultá ku e dos barkunan ku ta drenta ku e produktonan ta muchu grandi, esakinan den e kaso ei lo bai mara na  ‘’Grote Werf’’.

Curaçao Port Authority (CPA), ya a hasi e trabounan nesesario di forma ku e barkunan por para mayan sin ningun problema. Trámitenan ku duana ta tumando lugá pa asina sigurá ku e barkunan aki ta drenta ku e dokumentashon ta legal i asepta konforme reglanan internashonal, i produktonan ku ta  permití pa drenta Kòrsou ku n’e.

Mientrastantu trabounan a kuminsá tuma lugá pa e restourashon di e dak, i  tambe tonbank , pa asina manera primintí, nos hendenan lokal,  en espera di e plan definitivo por para i bende nan produktonan. Sí lo bai tin kòntròlnan severo pa ku higiena i sushamentu di nos laman, ya ku pa último tempu esaki a sali fo’i man kompleto.

Ministerio pa Desaroyo Ekonómiko i  demas ‘’ stakeholders’’ , ta trahando riba un plan riba largu plaso pa ku e restourashon di Cha Capriles Kade i ku mester kuadra ku e plan di restourashon di Punda i  Waaigat, manteniendo naturalmente e aspekto históriko I turístiko. Ministerio pa Desaroyo Ekonómiko ta pidi pueblo di Kòrsou un poko pasenshi,  i ta trahando duru mas pronto posibel keda kla ku e restourashon.