Saturday 23 September, 2017

Registrá pa entrenamentu pa trabou enkonekshon ku proyektonan modernisashon di refineria

SOAW ta konfia ku tur hende interesá lo registrá:

Ministerio di Desaroyo Sosial, Labor i Bienestar (SOAW) ta bai kuminsá ku registrashon pa tur hende ku ta interesá di risibí entrenamentu pa un fishi, pa mas despues nan por haña trabou den e proyektonan di modernisashon di refineria i Bullenbaai. Lo hasi esaki di un manera sentralisá pa atendé ku tur esunnan ku ta interesá. Djasabra 22 di aprel entre 8 or di mainta pa 8 or di anochi tin oportunidat pa pasa na Fundashon Adelanto Rooi Santu (FARS), Universidat di Kòrsou (UoC), Stichting Studiefinanciering Curacao (SSC), Feffik òf Sentro di Bario Tera Kòrá pa yena e formulario di registrashon. E vishon ta ku no ta permití niun estorbo pa hende por bini na remarke pa risibí e entrenamentu nesesario pa despues por haña trabou. Ministerio di SOAW ta prepará pa duna guia, apoyo i ayudo sosial na tur e personanan ménos privilegiá den komunidat pa nan tambe por partisipá den e proseso di trabou ku lo habri dentro di poko.

Den e próksimo lunanan lo tuma tempu pa analisá i evaluá tur e datonan ku keda registrá. Despues lo kuminsá e proseso di hasi intake ku kada persona ku a mustra su interes dor di registrá. E kombersashonnan di intake lo resultá den identifikashon di un grupo di persona ku lo risibí guia intensivo pa por desaroyá e abilidatnan nesesario pa por funshoná den forma efektivo na boka di trabou. Ta trata aki por ehèmpel di hendenan ku tin hopi tempu sin traha, òf ku ta den un situashon sosial delikado. Tambe tin un grupo ku lo mester risibí un entrenamentu básiko pa yuda nan yega na e nivel deseá promé ku nan ta kla pa kuminsá ku nan training. I finalmente tin e grupo ku ya ta kla pa kuminsá nan entrenamentu.

Ta duna entrenamentu pa e proyektonan den kuadro di modernisashon di Kòrsou su refineria, kual ta e proyekto di mas grandi ku Kòrsou a yega di konosé. Lo konstruí un kantidat grandi di planta i edifisio kompletamente nobo pa e refineria, modernisá e planta di Energia Curaçao Refinery Utilities (CRU) i ekspandé e terminal di transbordo di krudo na Bullenbaai. Mester di mas o ménos 4.500 hende pa trabounan ku ta varia entre otro di pipe fitter, mekániko, lasdó, trahadó di konstrukshon, fèrfdó i elèktrishèn te ku instrumentista, supervisor, inspektor i hende ku por pinta den Autocad. Lo prepará hende pa hasi e trabounan aki na e nivel deseá i usando e sistema di edukashon basá riba kompetensia. Ministerio di SOAW ta e instansia enkargá ku e reklutamentu di e 4.500 trahadónan aki. E invershonista enkargá ku e proyektonan na refineria, CRU i Bullenbaai, esta e kompania estatal chines Guangdong Zhenrong, tin palabrashon ku UoC i Feffik pa brinda e entrenamentu nesesario. Guangdong Zhenrong Energy Company Ltd asta a firma un MoU ku UoC i China University of Petroleum pa koperá den e área di entrenamentu. Ministerio di SOAW ta konfia ku tur hende interesá lo presentá na e lokalidat mas fásil di nan alkanse, pa nan registrá nan mes pa entrenamentu pa nan futuro trabou. Registrashon ta habrí pa tur hende!