Sunday 23 July, 2017

Siman di konsientisashon di korupshon a kuminsá

E Selfie Challenge “#MiMannanTaLimpi” ta reta tur hende pa públikamente hisa man i hasi un testimonio kontra di korupshon.

E Selfie Challenge “#MiMannanTaLimpi” ta reta tur hende pa públikamente hisa man i hasi un testimonio kontra di korupshon.

Awe e siman di konsientisashon di korupshon ta kuminsá. Di 15 te 22 di mei Fundashon Kòrsou Transparente ta pidi atenshon pa komportashon no integro i korupshon. “Un mihó komunidat ta den nos mes man” asina e fundashon ta enfatisá. 

Yama un tío pa logra mas lihe di laga kambia un bòter di gas bashi, regla un permit lihė via di un amigu, via via evitá e lista di espera pa un operashon, kue material di trabou pa uza na kas, kumpra artikulonan illegal pasobra esei ta sali mas barata, no deklará tur kos na belasting: hopi biaha e aktonan aki ta perhudiká otronan, ta resultá den faboritismo i ta pone kostonan subi. Den e kampaña aki di konsientisashon, Kòrsou Transparente ke stimulá e kombersashon i alabes hasi un yamada pa kada ken tuma responsabilidat pa su propio akshonnan. Asina konhuntamente nos por para e plaga di komportashon no integro i korupshon den nos komunidat.
 

#MiMannan TaLimpi
E Selfie Challenge “#MiMannanTaLimpi” ta reta tur hende pa públikamente hisa man i hasi un testimonio kontra di korupshon. E akshon aki ta basá riba e kampaña eksitoso riba media sosial#MyHandsAreClean di Corruption Watch na Sur Afrika, ku kende Kòrsou Transparente tin kolaborashon di forma estrecho. Bou di e hashtag#Mi MannanTa Limpi e partisipante ta primintí di tene su mannan limpi i ta reta amigunan di Facebook pa hasi meskos.

Bou di e hashtag #MiMannanTaLimpi personanan riba Facebook ta reta nan amigunan pa hasi un testimonio kontra di korupshon.

Punda Vibes
Djaweps anochi 18 mei 2017 for di 6 or di atardi durante Punda-Vibes riba Gomezplein, Kòrsou Transparente lo duna e kampaña un kara ku diferente aktividatnan interaktivo. Asina por ehempel bo por partisipá na e test “Kon limpi bo mannan ta?” i e fundashon lo parti habon chiki pa den un forma simbóliko hasi mannan shushi limpi.Tambe por wak e Muraya di Konfeshon-Testigo-Víktima i por hasi un konfeshon ὸf kompartí un eksperensia di forma anónimo. E duo musikal Evita Ros i Wietse Krikke den koperashon ku diferente artista lo estrená un tumba tokante korupshon. Despues nan lo simbolikamente pasa e pèn pa e siguiente artista , ken lo tin ku komponė un otro kantika tokante e tema. 

Kolumnonan konsientisashon di korupshon
Durante e siman diferente programa na radio i televishon lo trata e tópiko di Konsientisashon di Korupshon. Kolumnistanan i bloggers konosí manera Favell Maduro, Denise Vijber, Jeroen Jansen, Yves Cooper i Arien Rasmijn lo kompartí nan pensamento, vishon i observashonnan den kolumnonan pa yuda lanta e debate i tambe asina konsientisa Kὸrsou riba e fenomeno di korupshon.