Thursday 19 April, 2018

Simposio pa oumentá efektividat di siñamentu serka hóbennan

Universidat di Kòrsou Dr. Moises da Costa Gomez (UoC) i Sentro pa Inovashon i Guia Edukashonal (SIGE) a uni forsa un biaha mas pa konhuntamente organisá un simposio e aña eskolar akí na benefisio di nos hóbennan ku ta bai skol. E simposio titulá “Zelfregulerend leren met 14 leerstrategieën” a tuma lugá 12 i 13 di aprel 2018 den un ouditorio yen yen di UoC i a keda presentá dor di outor di e buki “Effectiever leren met leerstrategieën”, sra. Dr. Pieternel Dijkstra. E simposio tabata pa profeshonalnan den enseñansa, den kuido i pa mayornan ku kier sa kon nan por stimulá nan yunan (mas) mihó pa siña independientemente.

E simposio tokante strategianan di siñamentu a keda kordiná di parti di UoC dor di dr. Odette van Brummen-Girigori i di parti di SIGE dor di sra. Ruthmila Obispo, Master of Social Work.

Strategianan di siñamentu ta maneranan konkreto di siña ku un alumno por apliká pa laga e siñamentu kana mas fásil posibel. Uso adekuado di e strategianan di siñamentu akí ta sòru pa alumnonan sa kon mester siña, ta motivá pa siña i a lo largo presta mihó. Esaki ta konta pa tantu alumnonan ku problemanan di siñamentu i di komportamentu komo tambe pa alumnonan hopi sabí i alumnonan “mediokre”. Den e workshopnan anterior eksitoso di 28 i 29 di sèptèmber 2017 a splika e importansia di strategianan di siñamentu i a trata e manera ku e uso di nan ta wòrdu stimulá i di trein serka alumnonan. A trata 4 di e 14 strategianan di siñamentu, esta konosé bo mes, mira e benefisio, organisá bo mes i wak padilanti.

Durante e simposio aki e otro 10 strategianan di siñamentu a keda tratá. Esakinan ta dirigí riba reforsá e abilidatnan metakognitivo, kognitivo i organisatorio di alumnonan i tambe riba nan motivashon pa siña. Partisipantenan no a haña solamente ideanan nobo, pero tambe toolsnan konkreto ku kua nan por a kuminsá traha mesora ku nan alumnonan i/o yunan.

Tantu e direktiva di SIGE komo esun di UoC por mira bèk riba un simposio eksitoso i den futuro nan lo sigui uni forsa regularmente pa huntu kontribuí na formashon di profeshonalnan riba e tereno di Enseñansa i Trabou di Bienestar.