Friday 17 November, 2017

Ta suspendé entrada di karni for di Colombia por lo pronto

Dia 23 di yüni 2017 Colombia a raportá na OIE (Organisashon Mundial di Salú di Animal) ku a detektá un foko di un brote di Fiebre Aphtosa (FA) den e pais lokalisá na frontera ku Venezuela den e departamento di Acuara, munisipio di Tame. Despues di 1 dia a konfirmá den laboratorio ku ta trata di e vírus di FA. FA ta un malesa sumamente kontagioso ku ta endémiko den hopi pais rònt mundu i ku ta afektá animal ku hoef di split manera baka, porko, karné i kabritu. E síntomanan ta konsistí di e aparensha di blar den pata, boka i pechu di e bestianan, hipersalivashon , pèrdida di apetit i produkshon di lechi i te asta morto serka e animalnan afektá yòn. E impakto ekonómiko porta hopi grandi (Inglatera 2001 14 bion USD), p’esei hopi pais ta kombatí e malesa aki rigorosamente sea sin òf ku vakunashon. E transmishon ta tuma lugá dor di kontakto direkto òf indirekto (sushi, líkidonan korporal, artefaktonan, hooi ) ku animalnan afektá. E karni di e animalnan aki tambe ta kontagioso. Pa humano e malesa no ta forma ningun peliger pa salú.

Nos pais ta liber di FA i a mantené e estado ei, Hefe di Dpto. di Asuntunan Veterinario di Ministerio di GMN a tuma e medida di prekoushon di suspendé entrada di karni for di Colombia por lo pronto. Normalmente ta importá un promedio di 4 kònteiner di karni for di Colombia. Aktualmente tin 4 kònteiner riba ruta pa Kòrsou ku karni ku sigun e sèrtifikado di salú a produsí den e periodo promé ku a raportá i konfirmá e brote di FA. Lo avisá Duana pa ta mas alerta riba un posibel introdukshon di karni via aeropuerto i haf. Tambe lo monitòr ku e medidanan di kontingensha di e brote di FA ku e outoridatnan veterinario di Colombia ta implementando ta efektivo lokual ta enserá ku OIE tin ku aprobá i evaluá e ehekushon di e plan. Si a kaso kriadónan di animal tin kualkier prekupashon òf ta deseá informashon tokante e malesa di FA por yama 4614000 òf manda un e-mail na info.uovz@gobiernu.cw.