Monday 18 December, 2017

Tèst di HIV ta algu nòrmal

Mas i mas hende na Boneiru ta laga nan dòkter di kas tèst nan riba HIV. Hasi tèst di HIV a bira kasi mes nòrmal ku tèstmentu pa diabétis i preshon haltu. Un tèst di HIV ta pone e base pa mas rápido posibel haña un bon tratamentu. Ku e tratamentu ei HIV ta bira un malesa króniko ku bo por bira bieu kuné.

Segun hopi dòkter di kas e mensahe aki a penetrá bon serka poblashon di Boneiru. E dòkternan di kas a papia tokante e tópiko aki durante un reunion di trabou riba djarason 15 di novèmber. Departamentu di Salubridat Públiko den koperashon ku Asosashon di Dòkternan di Kas di Boneiru i e Poli di Infekshon di Fundashon Mariadal a organisá esaki. Un biaha mas algun spesialista di Amsterdam tabata presente kendenan a sostené e dòkternan di kas di Boneiru ku konseho i formashon.

Tèstmentu riba HIV ta birando mas i mas algu nòrmal. Tambe hendenan di edat hóben ku ta seksualmente aktivo ta bira mas konsiente di e importansia di hasi tèst i nan ta pidi nan dòkter di kas pa esaki. Gustosamente e dòkternan di kas di Boneiru ta koperá ku esaki. Pasobra si diagnostiká na tempu, por establesé e tratamentu adekuá den koperashon ku Poli di Infekshon di manera ku e pashènt por sigui traha nòrmal i partisipá den komunidat.

Te ainda ta eksistí hopi malkomprendementu tokante HIV. HIV ta un víres ku ta keda transmití entre otro pa medio di kontakto seksual. Un infekshon ku HIV ku no a risibí tratamentu ku tempu por kondusí na AIDS. Pa motibu di bon posibilidatnan di tratamentu awor HIV a bira un enfermedat ku bo por biba largu i salú kuné, sin haña AIDS. P’esei rònt mundu nos ta mira mas i mas hende di edat avansá ku HIV. Un persona ku tin un infekshon ku HIV, pa kende a establesé e medikashon adekuá i ku ta usa su medikashon fielmente, no por pasa e víres pa otro hende. Pa e motibu ei no ta nesesario pa keda sin papia tokante HIV i otro malesanan ku por keda transmití seksualmente. Si nos buska informashon korekto, por ehèmpel riba wèpsaitnan konfiabel, i papia tokante esei ku nos relashonnan, nos por evitá infekshonnan nobo. Por evitá infekshon ku HIV i otro malesanan ku por keda transmití seksualmente hasiendo uso di kondon.

E manera integral di atendé ku HIV, den koperashon ku hopi otro partido, ta pas den e maneho di salú seksual di Entidat Públiko Boneiru. Banda di prevenshon di malesanan ku por keda transmití seksualmente, prevenshon di embaraso indeseá i aborto ta un di e puntonan di lansa den esei. Prevení ta posibel: ‘Bai hasi tèst’ i ‘Usa kondon’. Si bo tin pregunta tokante e tópiko aki, tuma kontakto ku òf bishitá bo dòkter di kas.