Saturday 21 July, 2018

Tragedia na Koraal Tabak: Indikashon ku tin mas naufrago venezolano

Djárason 10 yanüari 2018 for di den alrededor di 10.45 or polis durante ku e tim di mantenshon di òrden públiko tabata hasi un investigashon den e área di Koral Tabak, nan a bin topa ku kuater kurpa sin bida 2 hende hòmber i 2 hende muhé kantu di awa, tres di e kurpanan tabata banda di otro i e di kuater kurpa tabata na un distansia. Mas aleu polis a konstatá ku na e sitio tin un kantidat di palu ku probablemente ta prosedente di un boto, un kantidat di jug ku kombustibel (gasolin) i diferente otro artíkulo manera paña i sapatu.

Mesora a bati alarma i kuminsá un investigashon na e sitio. Personal di Warda Kosta a bula ku e helikòpter na i rondó di e sitio pa basta ratu pa wak si tin sobribibiente i/òf kadaver. E sobrá unidatnan i personal di diferente departamento i organisashon ku tin tarea den tipo di kasonan asinaki a akudí na e sitio ariba menshoná.

For di un investigashon preliminar ku a realisá na e sitio a sali na kla ku probablemente e pida palunan ku a haña na e sitio ta prosedente di un lancha i ku e kurpanan sin bida ku a haña probablemente lo tabata riba e lancha aki.

Algu ku na e momentonan aki ainda no ta konosí a sosodé ku e lancha i e personanan aki probablemente a hoga i finalmente nan kurpa a bin resultá riba tera kantu di awa. E sobrá di e lancha, e jugnan di gasolin i e otro artíkulonan tambe a resultá riba tera.

A konfiská diferente artíkulo ku ta di importansia pa e investigashon. Mas aleu e espertonan na e sitio a konkluí ku e kurpanan sin bida tin algun ora ku nan a fayesé. Riba òrdu di Fiskal di Ministerio Públiko a konfiska e kurpanan sin bida pa mas investigashon.